Tabung Darah HUS ngelalau mensia mayuh terus datai meri darah
Tabung Darah Sepital Besai Sarawak (HUS) meransang sereta ngelaluka mensia mayuh bisi datai ninting hari meri darah dikena nentuka stok darah seruran chukup.
Pemesai Perubat, Bank Darah HUS, Dr Lu Siew Ling madahka diatu sepital ngembuan stok darah ti ba tikas ke selamat tauka chukup tang pemeri darah endang seruran diguna meri darah sida.
Sepital begunaka semua bansa darah, nya alai ku iya, semua pemeri darah ari semua bansa darah endang diperansang sereta dikelaluka datai meri darah.
“Ke diatu stok darah kitai ba tikas ti selamat tauka chukup tang kitai tetap mega begunaka semua pemeri darah datai meri darah, kebuah nya laban sepital ambis kurang nyendiaka 70 ngagai 75 pek darah ninting hari ti diguna pesakit sepital kitai. Darah tu mega bisi haribulan mati timpuh.
“Nya alai, kitai begunaka (pemeri darah) dikena nentuka darah ke digumpul ninting hari nya ambis nadai bisi disediaka ngagai pesakit.
“Ambika chunto, enti kitai nyendiaka 75 pek sehari dikena pesakit, nya alai, ambis nadai kitai ulih ngumpul 75 pek darah sehari dikena ngenyukupka enda ngira bagi bansa darah ke udah diberi ngagai pesakit,” ku iya seraya madah nya entara kebuah begunaka pemeri darah ninting hari.
Iya dirandau raban pengarang berita nyerumba pengawa meri darah ti diatur begulai entara Unit Pekara Jalai Pengarap Bukai (UNIFOR) enggau Unit Komunikasi Awam Sarawak (UKAS) ti diatur ba sebuah palan bebeli barang tebilang ditu, kemari.
Pengawa meri darah nya dipenyadi Sapit Menteri ba Opis Premier Sarawak (Unit Pekara Korporat, Pemadah enggau UKAS), Datuk Abdullah Saidol, sereta sama digulu Direktor UNIFOR Datu Jack Aman enggau Direktor UKAS Samuel Simon.
Bejaku baru, Dr. Lu madahka, gaya hari ti enda meruan sereta dipelaba penusah ngenyit bisi nyadi ti ngujungka sekeda ke endang udah nyadi pemeri darah tepekul deka meri darah,
sereta berindik ari nya mensia mayuh ke bedau nyadi pemeri darah diperansang datai nyaup meri darah.
Laban, ku iya, darah ke diberi pemeri darah nya ukai semina diguna pesakit ba HUS aja tang mega disediaka ungkup sepital pelilih menua enggau mega sepital peribit.
“Nya kebuah kami suah nyebut enda kala ngetu, ninting hari kitai begunaka darah, kitai begunaka pemeri darah meri darah sida.
“Kebendar, (darah) kitai ba tikas ke selamat tauka chukup laban HUS mega nyendiaka darah ngagai sepital peribit, sereta mega ngagai sepital ba pelilih menua
“Nya kebuah kitai suah nyebut ‘darah enda kala kemisi’. Nya kebuah kami amat begunaka darah dikena nentuka kitai chukup stok awakka ulih nyendiaka darah ngagai sepital bukai,” ku iya seraya madah Tabung Darah HUS dibuka ninting Hari Satu ngagai Hari Lima sereta tau dipeda nengah Facebook jadual maya Hari Minggu enggau kemisi iya nya program meri darah diatur.
Kelimpah ari nya, Jack lebuh dirandau ba program ti sama, iya madahka, nya sebagi ari tanggungpengawa sosial korporat UNIFOR, UKAS enggau kerejasama Tabung Darah HUS sereta Plaza Merdeka Management Sdn Bhd.
Jack ngarapka program kediatu nya deka meri penyedar ngagai mensia mayuh pasal pemesai guna meri darah enggau nyadi pemeri darah.
“Tu platform kena nambahka penyedar pasal pemesai guna meri darah enggau peluang ngagai pemeri darah voluntia meri darah sida kena nyelamatka nyawa orang bukai,” ku iya.