Harden udah ngabas tikas pemansang projek ngaga Jalai Ulu Paku, Undop
SRI AMAN: Sapit Menteri Pelajar, Inovasyen enggau Pemansang Penau Datuk Francis Harden Hollis bisi ngabas pemansang projek ngaga Jalai Ulu Paku, Undop ditu, apin lama.
Nitihka iya, pengawa ngabas projek nya berindik ari bisi sebana peranak genturung pendiau, iya nya Kampung Batu Lintang ti dikenataika ngagau opis Suruhanjaya Hak Asasi Manusia Malaysia (SUHAKAM) Sarawak pasal jalai raya ti tejanggal sereta dipadah ngeruga pengelikun penguna jalai raya ti ngena perengka pengangkut mit enggau motosikal.
“Bepelasarka sebana nengah siti surat dituju ngagai SUHAKAM Sarawak kenan 11 Januari tu tadi, aku udah ngabas taba projek nya kena 27 Januari sereta udah meda jalai ari simpang ke Ulu Pakau udah dibelakin enggau kereja ngaga benung dipejalaika,” ku iya.
Nitihka iya, projek ngemanahka agi Jalai Ulu Paku Undop dipelanja Opis Menteri Pemansang Menua Pesisir enggau Wilayah enggau diatu Opis Menteri Pemansang Tumpuk Pendiau enggau Wilayah (KKDW) sepemanjai lapan kilometer ari Simpang Kenyungan ngagai Sekolah Kebangsaan (SK) Paku sereta dipejalaika Opis Kereja Raya (JKR) Sarawak.
Kaban Kunsil Nengeri (ADUN) Simanggang nya nerangka, projek berega RM19.1 juta nya digaga dalam timpuh 18 bulan berengkah 13 januari 2022 ti digaga kontrektor Welfield Services Sdn Bhd sereta kepatut ia tembu kena 12 Julai 2023.
Tang ku iya, projek nya bisi laun ketegal sekeda faktor baka ubah langkar ba pelin asal ketagal ngalihka alai utiliti enggau faktor gaya hari.
Bejaku baru iya madahka, peminta timpuh tambah (EOT) sepenyampau 219 hari mega dikemendarka.
“Haribulan baru projek tembu pengudah dikemendarka EOT iya nya kena 23 Februari tu sereta diatu, kereja melakin jalai udah tembu enggau diatu mega fokus ngagai ngaga parit konkrit ba sepemanjai jalai nya,” terang iya.
“Kitai deka ngabas taba tu deka diperambu enggau sida SUHAKAM sereta ejensi ti ngaga projek, awakka meda kediri empu gaya jalai ti dipadah agi bebatu enggau tanah mirah.
“Tuju ngabas nya ngambika nerang sereta madahka pekara ti amat bekaul enggau sebana peranak ti dipelaba
ukai ba menua nya sereta peranak imigran ekonomi ti diau
ba mengeri,” ku iya dalam siti penerang ensanus.