Pemeresi genturung pendiau patut diintu, nyeliahka penyakit denggi
SRI AMAN: Pemeresi kandang rumah patut dijaga ngambika nadai alai nyamuk aedes betelu ti mai penyakit berampit denggi.
Sapit Menteri Pelajar, Inovasyen enggau Pemansang Penau Datuk Francis Harden Hollis madahka, nyadi tanggungpengawa Komiti Pemansang enggau Pengelikun Genturung Pendiau (JKKK) nentuka pemeresi kandang rumah sereta lantang enggau nadai nyadi sebarang penyakit.
“Enti kandang endur kita kamah, tu udah tentu deka nujungka mayuh penyakit nyadi baka denggi, taun, demam kepialu enggau ti bukai ke lalu ulih ngeruga pengerai orang ke diau ba endur nya.
“Sebedau penyakit ngeruga pengidup kitai, aku minta kaban JKKK ba tetiap kandang menua di pelilih menua tu ngambika ngatur program beripai ambis nadai sekali sebulan,” ku iya.
Iya ti mega Kaban Kunsil
Nengeri (ADUN) Simanggang madahka pekara nya lebuh bejaku ba Program Pemansang Komuniti Opis Kaunsil Pelilih Menua Sri Aman (MDSA) di Pasar Sabu, ditu, kemari.
Program ngerupan enggau kimpin pemeresi nya diatur Opis Kaunsil Pelilih Menua Sri Aman (MDSA) begulai enggau JKKK Bansa China Pasar Sabu.
Nitihku iya, pengawa beripai nya patut nyengkaum kereja meresi kandang endur baka nebas rumput, nentuka sistem parit enda sebat, ngumpul uras enggau ke bukai.
“Kandang endur ti enda diberesi enggau manah bisi potensial nyadi sarang nyamuk aedes, ku iya seraya madahka JKKK patut bejalaika inisiatif kediri empu enda ibuh ngarapka penatai MDSA maya program beripai.
Kelimpah ari nya, Harden bebendar madahka aktiviti ngerupan enda patut digaga bemusin tang patut dipejalaika belama, ukai semina maya pengerami.
“Enti kandang endur kitai beresi, tu udah tentu ngayanka gaya kitai ke ngempu rumah nya bisi tanggungpengawa enggau kadang endur kitai nya,” ku iya.
Sama bisi datai, Sapai Chairman MDSA Kunsilor Balean Suji Inggol, Pemangku Sapit Sekretari MDSA Regina Giles Senin, Ketuai bagi Injinia MDSA Fanny Jun Engang, Penulung Pemesai Pengerai Kandang Kandang Endur MDSA Fiona Bunu Joseph Lepa, Pemanca Lee Siang Hua, Penghulu Leonard Libau, Penghulu Mingging Sigan enggau Penghulu Andar Suntai.