Rayat Sarawak ulih ngenegapka penyerakup pupu bansa nengah pengawa ngabang

MIRI: Rakyat Sarawak dipinta terus besaup ngenegapka penyerakup bansa nengah pengawa ngabang maya musim pengerami.

Menteri Pengangkut Sarawak, Dato Sri Lee Kim Shin madahka, rayat Sarawak ti mayuh etnik enggau bansa ngerami pengerami besai begulai enggau diri sebilik sereta komiti bukai.

“Pengerami Taun Baru China, Hari Raya enggau Gawai diintu begulai. Sarawak chukup nyelai laban bisi diri sebilik ti bebida bansa, jalai pengarap enggau budaya ti sama berami,” terang iya maya program berandau khas nyerumba Taun Baru China (TBC) diatur Radio Televisyen Malaysia (RTM) Miri kemari.

Sama bisi datai, Pengurus Stesen RTM Miri Lydia Paya Rinyud sereta pemesai enggau staf RTM Miri.

Iya ti mega Kaban Kunsil Nengeri (ADUN) Senadin madahka, pengawa ngabang enggau bebasaka pangan diri ti udah nyadika Sarawak sebuah nengeri chunto ngayanka penyerakup enggau pemaik sereta pengelantang.

“Nya alai, kami amat ngemeratka rayat ngambika terus nyaga pemaik enggau pengelantang ke endang udah dikembuan.

“Sarawak chunto pemadu manah kena ngelai komuniti mayuh bansa ti idup dalam pemaik enggau pengelantang,” ku iya nerang.

Iya mega ngarapka rayat Sarawak terus meri pengarap ngagai Premier Sarawak neruska agenda pemansang ke pengelantang rayat.

Bekaul enggau pekara bukai, meri tabi puji ngagai Tun Dr Wan Junaidi Tuanku

Jaafar ti udah angkat sumpah mangku pengawa nyadi Tuai Pemegai menua (TYT) Nengeri Sarawak ke-8.

“Aku udah lama ngelala iya kenyau ari nyadi pemesai polis, pengari rayat, Yang di-Pertua Dewan Rakyat.

“Iya siku orang mayuh peneleba enggau pakar dalam undang-undang. Kitai meri tabi puji enggau ngarapka mujur,” terang iya.

Iya ti kala nyadi Yang diPertua Dewan Negara nya dichiri nyadi TYT Sarawak nitihka Perkara 1 Perlembagaan Negeri Sarawak dalam timpuh empat taun, nyentuk 26 Januari 2028.

Tun Wan Junaidi nganti Tun Pehin Sri Abdul Taib Mahmud ti mangku pengawa nya pengelama tiga penggal, berengkah 1 Mac 2014.