Wan Hamid, Vincent Lau enggau Stanley dichiri baru nyadi temenggong di Sibu
SIBU: Tiga iku ketuai komuniti di bagi menua Sibu iya nya Temenggong Datuk Wan Hamid Edruce Tuanku Mohamad, Temenggong Dato Vincent Lau Lee Ming enggau Temenggong Stanley Geramong Bandar udah dichiri baru nyadi temenggong ungkup timpuh dua taun agi.
Ketetiga sida tu bela ngarika raban bansa Melayu, China enggau Iban, meri besai terima kasih ngagai perintah nengeri ari baruh pegai Premier Sarawak Datuk Patinggi Tan Sri Abang johari Tun Openg ti udah nyiri baru lalu berengkah bejalaika pengawa kena 1 Januari 2024 nyentuk 31 Disember 2025.
Lau ti mega udah nyadi temenggong kenyau ari 13 taun ti udah madahka deka enggau bebendar meri servis ngagai perintah sereta rayat di bagi menua tu, kelebih agi raban bansa China.
“Nyadi raban ba rintai mua dalam struktur organisasyen perintah, tanggungpengawa besai ketuai komuniti iya nya dalam mantu ngesahka dokumen rayat. Tu tanggungpengawa ti berat siku ketuai komuniti.
“Kelimpah temenggong, baka pemancha enggau penghulu mega diberi sitak ke dijaga ngambika nyema dipinta Opis Residen tauka Opis Pelilih Menua mantu ngesahka dokumen, kitai sama ulih besaup,” ku iya madah ngagai pengarang berita pengudah nerima notis nyiri baru nyadi temenggong ba Opis Residen Bagi Menua Sibu, kilah ensana.
Notis nyiri baru tu udah disuaka ngagai ketetiga sida ari Residen Bagi Menua Sibu Datu Wong Hee Sieng seraya dikemataka Kaban Kunsil Nengeri (ADUN) Bukit Assiek Joseph Chieng.
Lau, 76 taun, mega meri ngagai mensia mayuh dalam meda tikas pemanah iya gawa sereta raban bansa China ke bukai ditu, ke udah bebendar, komited enggau tanggungpenggawa sereta beserakup.
“Taja pia aku pechaya ketuai bansa China ditu udah bebendar, komited enggau beserakup. Tu siti pekara ti ngemegah enggau ngandalka aku,” ku iya nerang seraya nambah nyadi raban ba rintai mua, sida mega megai tanggungpengawa meri penerang sereta madahka bekaul enggau polisi perintah ti deka dipejalaika.
Temenggong Wan Hamid mega madahaka enggau bebendar dalam bejalaika pengawa ungkup nentuka rayat enggau perintah terus begulai dalam ngemuntangka pengawa enggau peminta peranak di Sibu, kelebih agi raban buiputera.
Semanjai ti meri servis pengelama 24 taun, iya madahka nyadi ketuai komuniti nemu penanggul ti nyadi ba renggat baruh lalu raban bumiputera ditu enda betapi enggau mayuh penanggul.
“Kitai mega patut bekerejasama enggau raban bansa bukai. Kitai melabaka Sibu deka terus mansang agi lalu kerejasama ti manah tu deka ngemanahka ekonomi peranak ditu,” ku iya.
Lalu pia mega nitih ku Temenggong Stanley, iya ngarapka semua ketuai komuniti ulih bekerejasama enggau iya dalam mutarka penanggul ti ditapi bansa Iban ditu kelebih agi ti ngaul pekara hak tanah.
“Aku ngarapka kitai semua ulih mutarka penanggul tu enggau manah,” ku iya lalu mega minta kerejasama enggau komuniti bukai baka China enggau Melayu tu ulih diteruska.
Iya ti beumur 65 taun, Stanley udah nyadi temenggonga kenyau ari 14 taun ti udah.