BIK pemegai KGC deka diubah
Bisi sebana ari sekeda pemegai kad ti ngasaika diri nadai berasai ngena sebarang penguntung ari bantu nya
SIBU: Bantuan Ihsan Kematian (BIK) ti diberi perintah nengeri ngagai orang tuai ke bisi Kenyalang Gold Card (KGC) di nengeri tu sepenyampau RM3,000 deka diubah taun tu, ku Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah.
Nitihka iya, opis menteri iya ngaga pemutus nya berindik ari bisi sebana ari sekeda pemegai kad nya ti ngasaika diri nadai berasai ngena sebarang penguntung ari bantu nya.
“Mayuh pemegai kad KGC minta ngambika sida ulih nerima penguntung bantu nya maya agi idup.
“Dalam ubah nya kitai deka ngurangka penyampau BIK enggau minta ngambika pemegai kad nerima bantu perubat pengerai,” ku iya maya bejadi ‘Majlis Sejambak Kasih Tahun Baharu Cina 2024’ diatur Opis Pengelantang Komuniti Bagi Menua Sibu di sebuah hotel tebilang ditu, kemari.
Fatimah ti mega Kaban Kunsil Nengeri (ADUN) Dalat madahka, pengudah diubah ila pemegai KGC ulih ngena bantu nya berubat ba sepital swasta ke nyadi bakih strategik KGC.
KGC, iya nya eksklusif ungkup rayat Sarawak ti beumur 60 taun ke atas, sida ulih ngasaika pengelebih enggau penguntung kad baka diskaun ba produk enggau servis ungkup rayat Sarawak ari vendor strategik KGC, kelimpah ari nyendiaka BIK RM3,000 kena ngelempungka belanja maya ngintu pemati pemegai kad.
BIK semina diberi ngagai pemegai KGC ke nadai insuran, Tabung Haji, sereta Gerempung Pengelikun Sosial (PERKESO) enggau ti bukai.
Kelimpah ari nya, ba pengerami nya Fatimah mega meri pemeri angpau RM100 sereta hamper berega RM80 ngagai 100 iku penerima bantu pengelantang kena ngerami Taun Baru China.
Sama bisi datai ADUN Bukit Assek Joseph Chieng, Direktor Opis Pengelantang Komuniti Sarawak Adana Jed, Pemesai Opis Pengelantang Komuniti Bagi Menua Sibu Tang Kee Lee sereta temuai bukai.
Mayuh pemegai kad KGC minta ngambika sida ulih nerima penguntung bantu nya maya agi idup.
Dato Sri Fatimah Abdullah