Mini KUD peluang orang dagang menua pesisir ngerembaika produk
KOTA SAMARAHAN: Mini Karnival Usahawan Desa (KUD) ti diatur pengelama empat hari di Halaman Kota Samarahan ditu meri peluang ngagai orang dagang menua pesisir ngerembaika produk ngagai makit ti lebih besai.
Sapit Menteri Pemansang Tumpuk Pendiau enggau Wilayah Datuk Rubiah Wang madahka, entara objektif karnival nya diatur ti berengkah seharitu nyentuk 4 Februari, iya nya kena nyendiaka ruang enggau peluang ngagai orang dagang ke ari baruh opis menteri iya meri kelala tauka ngelakuka produk sida.
Program nya ku iya, siti ari strategi opis menteri kena nambahka penatai pemisi orang dagang seraya mantu pemansang ekonomi komuniti menua pesisir.
“Tu bekaul enggau orang dagang pemakai enggau ai irup; fesyen indu, lelaki enggau nembiak mit; produk betanam betupi sereta bekaul enggau ngias diri.
“Dalam timpuh Mini KUD tu diatur, kitai mega deka ngenipakka pengawa dagang enggau sekeda kompeni besai.
“Ngenipakka pengawa dagang reti ia kitai nganggauka
kompeni luar kelebih agi ‘retailer’ baka Mydin, Petronas, Shell sereta Aeon ngambika meda produk kitai ke deka dijual dalam makit sida.
“Kediatu kitai nguna peluang ngenipakka produk orang dagang kitai enggau ‘retailer’ awakka makit produk nya ukai semina ditu aja, tang ulih ngerembai ke dalam servis dagang ti lebih besai,” ku iya.
Iyamadahkapekaranyamaya baum pengarang berita pengudah ninjau taba Mini KUD di Halaman Samarahan.
Rubiah madahka, sida iya
nyendiaka dua hari nya alai bejalaika pengawa ngenipakka pengawa dagang nya.
“Kitai bisi dua hari ngenipakka sereta kitai deka nganggauka orang dagang enggau ‘retailer’ ngambika nerangka syarat enggau produk ti ulih tama ngagai makit ‘retailer’ nya.
“Baka Mydin, sida bisi spesifikasyen produk ti dikedeka sereta dijual dalam makit sida.
“Sida Mydin deka meri penerang ngagai orang dagang sereta dalam timpuh ti sama, sida ulih besetuju bekaul
enggau produk ti patut,” ku Kaban Parlimen Kota Samarahan nya.
Kelimpah ari nya, Rubiah madahka Mini KUD meri impak besai ngagai orang dagang di Sarawak kelebih agi ba taun tu.
“Mayuh orang dagang ti ngambi bagi, bisi lebih 100 iku orang dagang ti dipilih ngemujurka karnival tu,” ku iya
Karnival mini nya deka dipenyadi Sapit Menteri Besai ti mega Menteri Pemansang Tumpuk Pendiau enggau Wilayah Datuk Seri Dr Ahmad Zahid Hamidi lemai pagila.