57 iku mujur nembuka kelas belajar ngajat
Bisi 57 iku ti nyengkaum 44 iku indu enggau 13 iku lelaki mujur nembuka kelas belajar ngajat ti diatur ASADIA Pampang Siburan di Siburan.
Serumpu makai lemai nyerumba nyuaka setipikit ngagai semua 57 iku nya diatur apin lama, seraya digulu pemesai pelilih menua (DO) Siburan Ranum Bari, ti ngarika Sapit Menteri Pengangkut Datuk Dr. Jerip Susil.
Lebuh bejaku ba pengerami nya, Ranum muji pengawa ti dipejalaika ASADIA ti udah bebendar ngetan sereta ngangkatka main asal bansa.
“Terima kasih ngagai ASADIA ti udah bebendar ngajar main asal ngagai nembiak rebak baru.
“Nadai orang bukai ulih dikearap ngatur pengawa main asal enti enda kitai ke udah besai tuai tu,” ku iya.
Ranum lebuh ti ninga sebana nadai meruan alai ASADIA ngatur main asal, iya meri penemu ngambika berunding enggau ketuai Genturung Pendiau Taman Duranda iya minta ngatur kelas belajarka main asal ba Balai Taman Duranda Siburan.
“Taja pia aku enggau naka ulih ngenataika sebana kita (ASADIA) ngagai YB Datuk Dr. Jerip Susil bekaul enggau pekara tu,” ku iya.
Nambah nya Presiden SADIA, Sidi Munan ngarapka ASADIA enda leju sereta enda mantul nyaga sereta ngidupka main asal.
Ku iya, penanggul endang bisi tang dikearap ulih napi penanggul nya enggau liat ati sereta ngena runding ti betul awakka ulih diputar ngena chara engkeman.
Kelimpah ari nya, Ketuai ASADIA, Mabong Unggang lebuh bejaku, ngelalau sereta ngingatka sida ke udah tembu belajarka main asal nya patut anang leju belajarka main asal bansa diri.
“Aku ngarapka kita ke udah
tembu belajar tu anang ngetu naka tu aja, tang patut terus belajarka mayuh bengkah main asal kitai nyentuk landik sereta ulih nyadi pengajar.
“Nengah chara nya main asal kitai ulih angkat sereta ngerembai sereta enda punas ketegal segang pemansang dunya baru.
“Anang leju magi penemu enggau pengelandik main asal kitai, laban nya mih tanda tauka identiti bansa kitai,” ku iya seraya madahka ba taun 2024 ASADIA mega deka deka terus ngatur mayuh bengkah main asal bansa Dayak.