Palan Main Asal enggau Kraf Jari JKKK Dayak di Taman Sri Jaya nguntungka komuniti
SRI AMAN: Pengawa ngaga Palan Main Asal enggau Kraf Jari Komiti Pemansang enggau Pengelikun Genturung Pendiau (JKKK) Dayak di Taman Sri Jaya, Sri Aman ditu deka meri penguntung ngagai komuniti ngelinggi kandang genturung pendiau nya.
Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis nerangka projek ngemanahka agi palan nya nyengkaum skop projek pagar ngelinggi begunan, pagar belanchar enggau dua buah agu ngena belanja RM100,000.
“Projek tu udah tembu semua sereta ia ngena ungkup belanja Projek Transformasyen Menua Pesisir (RTP) aku empu,” ku iya maya bejadi Projek RTP nya enggau nyambut Taun Baru China ti diatur ba Palan Main Asal enggau Kraf Jari nya ditu, kena 27 Januari tu tadi.
Iya ti mega Kaban Kunsil Nengeri (ADUN) Simanggang ngarapka pemansang nya sama nguntungka komuniti ngelinggi nya nyengkaum sida ke diau ba Taman Sri Jaya ditu.
“Aku ngarapka, palan main asal enggau kraf jari ti dikemanansangka tu ulih dikena peranak ngelinggi tu sekalika dikena ngatur kelas belajarka kraf jari ti ulih nambahka penatai pemisi peranak sereta ngatur kelas main asal baka kelas ngajat enggau ti bukai,” terang iya.
Berebak enggau tu, iya beterima kasih ngagai Komiti Pengatur laban ngembuan inisiatif ngatur pengerami nya kelai terima kasih ngagai perintah Sarawak ti udah meri ungkup belanja ngagai komuniti dalam sitak ti diarika iya.
Nyerumba pengerami nya JKKK (Dayak) Taman Sri Jaya bisi ngenataika peminta ngagai Harden, iya nya minta ungkup belanja dikena nukar perabung Palan Main Asal enggau Kraf Jari ti udah lama enggau palan ngengkahka kerita
Bekaul enggau pekara nya, Harden ngemendarka ungkup belanja MRP Taun 2024 ngagai JKKK Dayak, Taman Sri jaya sepenyampau RM5,000 enggau ungkup Biro Indu sepenyampau RM5,000.
Urung 350 iku kaban JKKK datai ngulu pengerami nya, sereta sama digulu Sapit Chairman Majlis Daerah Sri Aman (MDSA), Kaunselor Balean Suji Ingol, Penghulu Leonard Libau Anol, Penghulu Mingging Sigan, Tuai Rumah Tarang Ayu enggau sida bukai.