Universiti lokal dipinta masukka tukuh IC dalam kurikulum akademik
KUCHING: Universiti lokal dipinta ngemasukka tukuh Litar Bersepadu (IC) nyadi kurikulum akademik kena nentuka graduet landik dalam aspek kritikal teknologi nya.
Menteri Pelajar, Inovasyen enggau Pemansang Penau, Dato Sri Roland Sagah Wee Inn madahka, nya kena nyendia tauka nyikap graduet napi peminta guna landskap teknologi ti seruran ngerembai seraya kena meri pengelebih besemekih ngagai sida dalam makit kereja.
“Kelimpah ari nya, ia nempa penau dalam tukuh IC ti mai ngagai penumbuh enggau pemansang semua industri lokal kitai.
“Ngemasukka tukuh IC dalam program akademik kitai, nya ukai semina strategi kena ngemansangka pengelandik individu tang ia chara strategi ti bisi potensyel kena ngubah Sarawak nyadi palan inovasyen, teknologi enggau penumbuh ekonomi ti ngerembai maju,” ku iya.
Iya madahka pekara nya maya baum pengarang berita pengudah bejadi nutup ‘Majlis ‘Train-The-Trainers: Talent Development in Semiconductor and Chip Design’ diatur Sarawak Microelectronics Design (SMD) Semiconductor Sdn Bhd ditu, kemari.
Sagah ti mega chairman SMD madahka, kena nyadika Sarawak dimua dalam nempa ti ukai semina penau lokal ti berega tinggi tang mega bepengelandik tinggi.
Ku iya, kena nempa penumbuh KDNK kilang nengeri nengah eksport ti nguntungka baka kompenan tauka cip semikonduktor, amat beguna kena perintah nyampurka tukuh IC ke dalam program akademik.
“Ngena chara baka nya, kitai ukai semina nyikap graduet ngena pengelandik pemadu baru tang mega bejalaika tanggungpengawa beguna kena mai wilayah kitai nyadi palan difokus alai inovasyen enggau teknologi,” ku iya.
Lebuh bejaku ba pengerami nya, Sagah madahka, iya chukup meransang semua orang nyukung tukuh IC enggau nyadika nya pilih ti manah kena nembiak ngepunka pelajar sida.
Ku iya, pengawa ngelakuka tukuh IC nyadi pilih keterubah ukai semina ngemanahka agi pilih akademik tang mega meri peluang ngagai nembiak mujur dalam bidang dinamik tu.
“Aram kitai sama besaup nempa kandang endur belajar ti ngenegapka mensia mayuh enggau nyukung institusyen kitai nyadi pemungkal dalam pelajar teknologi,” ku iya.
Ku iya, komuniti patut nerima anggap, iya nya tukuh IC ukai semina kena milih kereja tang kena matak ti bisi potensyel sereta narit imiginasyen graduet kitai.
“Ngena chara nya, kitai muka jalai ke raban graduet jemah ila ti ukai semina landik dalam bidang akademik tang mega tebatak ati ngagai kereja ti bisi empas manah enggau dinamik dalam tukuh IC.
“Nyampurka tukuh IC ke dalam akademik kitai, kitai nyadika nya asas ekosistem lokal ti kuat enggau dinamik ti lalu matak raban profesional, pemansik enggau orang dagang,” ku iya.
Pengerami nya mega digulu Sapit Menteri iya, Datuk Francis Harden Hollis enggau Ketuai Pemesai Eksekutif SMD Shariman Jamil enggau sida bukai.