25 rumah panjai alai ngatur program vaksinasyen antirabies

Opis Servis Veterinar Sarawak (DVSS) deka ngatur program vaksinasyen antirabies pechuma ba jelu bulan tu kena nagang pengelekai penyakit nya di pelilih menua Sebauh.

Program nya deka diatur ari rumah ke rumah kena 3 enggau 4 Februari (Hari Enam enggau Hari Minggu) ari pukul 2 ngagai 5 lemai (Hari Enam) sereta ari pukul 8 pagi ngagai 5 lemai (Hari Minggu).

Tuai Servis Veterinar Bagi Menua Bintulu Dr Naziah Muntil madahka, bisi 25 buah rumah panjai dipilih alai ngatur program nya.

Rumah panjai nya, iya nya Rumah Penghulu Chin Gawing, Agnes Mampak Mandaw, Bare Langie, Bunyau Liban, Divid Asson, Edi Makin, Egar Andil, Entiri Chaong, Gani Lansam, Gendin Metan, Gini Utiat, Joseph Sada Ingan, Leslie Wilson Empeni, Maisie Jambai, Malang Juni, Meni Cili, Ningkan Lansam, Nikoli Melly Juna, Patrick Andin Uli, Penga Mandaw, Ronnie Ugat Ngah, Taga Nawoh, Thomas Nyaring, Timban Metan enggau Jawang Mat.

“Sebuah agi iya nya diatur ba Kuarters Perintah Nengeri Pelilih Menua Sebauh,” ku iya dalam penerang berita ti disadung Hari Empat.

Nitihka iya, orang ke ngempu jelu tupi dikeingat ngambika seruran nentuka ukui sida iya beumur ambis kurang tiga bulan sereta gerai sebedau dituchuk vaksin antirabies.

“Sida mega mesti mai MyKad enggau enti bisi, kad vaksinasyen jelu tupi sida. Pengudah divaksinasyen, orang ke ngempu jelu tupi nya mesti nyeraraka tauka isolasyen ukai sida pengelama 28 hari kena ngangkatka imuniti ngagai rabies,” terang iya.

Iya madahka, sida mega dilalau enda meri ukui nya mandi ambis kurang seminggu pengudah divaksinasyen enggau enda ngelakka ukui bekedayau ba palan orang mayuh.

DVSS madahka, semua orang ti ngempu jelu tupi di Sarawak mesti nentuka ukui sida dituchuk vaksin rabies tiap taun nitihka Perintah Vaksinasi Anti-Rabies.

Orang ke enda nitihka atur nya dianggap salah ari baruh Seksyen 40 Ordinan Kesihatan Awam Veterinar 1999, ulih diukum enda lebih ari RM2,500.

Opis nya mega nangkan, iya nya ukui nya enti ditemu nyata nadai divaksin ulih ditan.

Kena 16 Januari apin lama, Menteri Industri Pemakai, Komoditi enggau Pemansang Wilayah Dato Sri Dr Stephen Rundi Utom netapka Bintulu enggau Kuching nyadi kandang endur dirampit rabies.

Kena 26 Januari, Direktor Pengerai Nengeri mya nya Dr Ooi Choo Huck madah bisi tiga pemati baru bekaul enggau rabies taun tu iya nya dua di Kuching enggau siti di Bintulu.

Pesakit di Bintulu iya nya siku lelaki beumur 61 taun ari Sebauh dikeramak ukui enggau mayau tupi iya taun nyin kemari, tang nadai diperubat nyentuk lemi enggau tusah nelan ai kena 5 Januari tu tadi.

Jelu tupi iya begulai enggau jelu lelang sereta nadai siku udah dituchuk vaksin rabies sereta lelaki nya udah nadai kena 12 Januari tu tadi.

Orang ke ngempu jelu tupi enti enda sempat enggau prgram vaksinasyen antirabies pechuma tau betelefon ngagai bagian DVSS maya gawa sereta ngaga semaya kemaya ulih meri vaksin ba ukui.

Tau betelefon ngagai opis veterinar bagi menua di Kuching ba lumur 082-628249, 082-628250 tauka 082-628255, Serian (019-2045829), Samarahan (082-671221), Sri Aman (083-322106), Betong (083-471622), Sarikei (084658129), Sibu (084-330224), Kapit (084-798280), Mukah (084-871050), Bintulu (086335770), Miri (085-411866), Limbang (085-215879) enggau Lawas (085-285085).