Sarawak nyukung pengawa ngasilka grafit: Premier
Nengeri tu betuah bisi sumber energi ulih dikena baru kena ngasilka hidrogen nengah elektrolisis
KUCHING: Sarawak nyukung tauka ngelaluka pengawa beranakka puku ti meruan di Sarawak nyengkaum ngasilka grafit (mineral) kena mantu sektor hidrogen ti majak ngerembai di nengeri tu.
Premier Sarawak, Datuk Patinggi Tan Sri Abang Johari Tun Openg madahka, Sarawak ngambi bagi dalam pengawa ngeluarka hidrogen enggau nengeri tu chukup betuah laban bisi sumber kelebih agi energi ulih dikena baru kena ngasilka hidrogen nengah elektrolisis.
“Kami (Sarawak) bisi perengka pengangkut mensia mayuh ti dikuasaka hidrogen enggau begunaka grafit dalam teknologi ‘bahan api’ tu.
“Nya alai, endang patut kitai bisi kilang ngasilka grafit, ti ulih nyadi ‘supply chain’ tauka rentayan bekal sadung ngagai sida dalam industri pengangkut ngeluarka kerita ngena asil grafit di Sarawak,” ku iya.
Iya madahka pekara nya maya ngemataka pengawa nyain Sempekat Pemereti Ati (MoU) entara Kumpulan Syarikat SEDC Energy enggau Kumpulan Syarikat Gallois dikena bejalaika Pembangunan Loji Pemprosesan Grafit ditu, kemari.
Kumpulan Syarikat Gallois, diarika Gallois New Energy Materials (M), Malaysia (GNEM), sebuah entiti ti baru ditumbuhka, mai mayuh orang ti pandai tauka landik.
Nitihka Abang Johari, fokus ngagai proses, pengawa ngeluar, jual beburung enggau dagang runchit produk bekaul enggau grafit, GNEM naga numbuhka kilang ngeluarka grafit di Taman Perindustrian Samalaju, Bintulu, ti lalu nyadika Sarawak pengemeran besai dalam industri grafit.
“Gallois, ti tebilang enggau operasyen ngelembang enggau proses napis di Madagascar, bediri nyadi kuasa besai dalam pengawa ngeluarka grafit.
“Penyelai asal enggau grafit bekualiti tinggi sida, ditisihka
struktur kristal ti meruan, nyadika sida bakih kunsi ti ideal tauka senipak ba sektor hidrogen ti majak ngerembai di Sarawak.
“Bekunsi tu ngelui ari MoU ke disain, ia nandaka kerejasama ti ngelui ari keretas
kereja,” ku iya.
Iya madah kerejasama nya setipak enggau juluk ekonomi Sarawak, ngayankan komitmen Sarawak dalam inovasyen enggau pemansang.
Ku iya, fokus besai MoU nya, iya nya pemansang komponen
teknologi kimia kena ngeluarka hidrogen enggau ngembuan juluk ti sama kena meri pemeri besai ngagai pemansang ekonomi Sarawak, ngemeratka hidrogen nyadi sektor strategik ti beguna ngagai Sarawak ti meruan jemah ila.
“SEDC Energy, dimua ba pengawa dagang energi ti meruan, ngembuan portfolio ti mayuh macham nyengkaum Minyak Alga Mentah, Bahan Api Penerbangan yang Sesuai, Biojisim, nyendiaka hidrogen, pengawa dagang hiliran enggau saut mobiliti gadung.
“Kerejasama tu ngangkatka agi pengulih Sarawak, ngenegapka komitmen kami ngagai landskap energi ti lebih beresi enggau lebih gadung,” ku iya.
Kelimpah ari nya Abang Johari madahka ensanus iya nerima penemuai basa ari Pesuruhjaya Tinggi British ti madah deka bekerejasama enggau Sarawak ngasilka kuasa ngena palet kayu.
“Kitai deka fokus ngagai pengawa nambahka energi ulih dikena baru enggau produk kitai nyadi produk gadung. Aku ngarapka bisi grafit ti datai ari Sarawak,” ku iya.
Kami (Sarawak) bisi perengka pengangkut mensia mayuh ti dikuasaka hidrogen enggau begunaka grafit dalam teknologi ‘bahan api’ tu.
Datuk Patinggi Tan Sri Abang Johari Tun Openg