Ngabang TBC Renggat Nengeri 2024 kena 10 Februari, di BCCK
Orang mayuh dikanggau sama enggau nyambut pengerami Taun Baru China (TBC)Renggat Nengeri 2024 kena 10 Februari di Pusat Konvensyen Borneo Kuching (BCCK).
Sapit Premier, Datuk Amar Dr. Sim Kui Hian madahka tu keterubah ia perintah Sarawak ngatur pengerami TBC beskala besai ti ngena konsep ngasuh ngabang.
“Pengerami tu besai reti laban ia ngayanka pemayuh etnik kitai di Sarawak seraya ngangkatka semengat ngasuh ngabang maya pengerami.
“Kelimpah ari nya, taun tu mega ngelai Taun Naga komuniti China ti nanda ke pengering, kuasa, penemu dalam, enggau pemujur,” ku iya.
Iya ti mega chairman pengatur madahka pekara nya maya baum pengarang berita TBC Renggat Nengeri 2024 di Bilik Baum Besai, Ringkat 2, Wisma Bapa Malaysia ditu, kemari.
Nyerumba pengerami TBC taun tu, perintah Sarawak ngatur pengawa ngasuh ngabang TBC Renggat Nengeri kena 10 Februari di BCCK
ditu.
Tuai Pemegai Menua Sarawak, Tun Dr Wan Junaidi Tuankun Jaafar enggau bini iya Toh Puan Fauziah Mohd Sanusi, sereta Premier Sarawak Datuk Patinggi Tan Sri Abang Johari Tun Openg enggau bini iya Puan Sri Datuk Amar Juma’ani Tuanku Bujangdeka ngulu pengerami tu.
Maya pengerami nya ila
mega, mayuh program deka diatur nyengkaum pengerami ‘Yee Sang’ ari temuai dipebasa, pemerindang main asal, tanda asal enggau belagu ari raban Band Agura ari Majlis Seni Sarawak.
Semua dikanggau ngabang, komiti pengatur ti bechairmanka Dr. Sim naga ambis nadai 5,000 iku pengabang deka datai enggau ngerami ba pengerami TBC ti keterubah
ia diatur perintah Sarawak.
Berindik ari pekara nya, Dr. Sim ngelaluka orang mayuh datai ngabang berengkah ari pukul 9 pagi ngagai 3 lemai, sereta ngena gari ti manah.
Iya mega ngarapka Sarawak deka terus maju enggau betuah belimpah sereta rayat ti terus dalam pemaik enggau beserakup enda ngira latar belakang budaya, bansa kena
ngayanka pemaik enggau pengelantang sereta penyerakup di Sarawak.
Sama bisi datai, sapit chairmanpengatur Datuk Michael Tiang ti mega Sapit Menteri Pengerai Mensia Mayuh, Pengawa Berumah enggau Perintah Lokal; sekretari pengatur Datu Hii Chang Kee ti mega Sapit Sekretari Perintah Nengeri enggau kaban komiti pengatur bukai.