Perintah Sarawak ibuhka pekara diguna rayat
Perintah Sarawak ti diiring Premier Sarawak Datuk Patinggi Tan Sri Abang Johari Tun Openg seruran ibuhka pekara diguna rayat di nengeri tu.
Kaban Kunsil Nengeri (ADUN) Meradong Datuk Ding Kuong Hiing madahka, projek pemansang udah, benung enggau deka terus diberi nengah mayuh chara.
“Siti ari asil pengawa ti pemadu efisyen iya nya ngaga projek ngena ungkup belanja projek mit menua pesisir (RTP).
“Ngena inisiatif tu, mayuh aktiviti pemansang kelebih agi di kandang menua pesisir udah mujur dipejalai enggau diasaika rayat.
“Polisi pemansang tu mega sebagi ari chara perintah Sarawak ngenyemakka bida pemansang di entara kandang mengeri enggau menua pesisir,”
ku iya.
Iya madahka pekara nya ba atur pengawa nyuaka Taba Projek RTP DUN Meradong, Hari Empat.
Ba pengerami nya, Ding ngemataka pengawa nyuaka projek ngemanahka tengah
laman dua rumah panjai ti udah tembu, iya nya Rumah Ujang Brinau enggau Rumah Maja Kayan, Bintangor.
Nitihka Ding, dua bengkah projek nya begunaka ungkus belanja sepenyampau RM80,000.
“Asil ari pengawa ngabas projek tu, kami puas ati laban tembu tumu ari timpuh ti udah ditetapka.
“Sida Opis Kereja Raya (JKR) Bagi Menua Sarikei mega bejalaika tanggungpengawa beguna laban ti seruran terit dalam pengawa matau kereja ke dipejalaika kontrektor enggau bisi kerejasama ari peranak rumah panjai.
“Ia ukai semina kena nentuka semua spesifikasyen dititih, tang mega projek ditemu nitihka timpuh ti udah ditetapka.
“Pekara tu amat beguna laban semua projek RTP ari perintah Sarawak iya nya nguntungka rayat,” ku iya.
Kelimpah ari nya, Ding mega ngabas projek RTP di Sekolah Kebangsaan (SK) Rentap ti udah tembu ke dijaga Opis Parit enggau Entali Ai (JPS) Bagi Menua Sarikei enggau ungkus projek sepenyampau RM100,000 ti nyengkaum pengawa ngemanahka palan ngengkahka kerita sereta kereja nyemin jalai besai nuju ke sekula nya.
Sama bisi datai, Penulung Injinir JKR BAgi Menua Sarikie Siti Anastasya Saili.