Pasar Basah Bau baru udah dibuka, chukup fasiliti

Pasar Basah Bau baru diatu dibuka ti disikap ngena fasiliti ke chukup sereta ngelantangka pedagang enggau pemeli.

Pasar baru di Pekan Bau nya dipenyadi Sapit Menteri Pengangkut (Sungai enggau Tasik) Dato Henry Harry Jinep, kemari.

Lebuh bejaku, Henry madahka Pasar Basah Bau nya dikemansang ngena ungkup belanjasepenyampauRMN2.2 juta ari perintah Sarawak.

Lalu, kereja bekaul enggau tanah dipejalaika Majlis

Daerah Bau (MDB) ngena ungkup belanja sida empu, ku iya.

“Terima kasih ngagai perintah Sarawak laban ti udah ngemendarka ungkup belanja nya. Diatu udah tembu sereta kitai udah mindahka sida pedagang tu ngagai endur baru,” ku iya.

Dulu ari nya, Henry nerangka pasar basah baru nya endang patut, alai mindahka pedagang ari pasar basah lama ti manah agi endur bedagang.

Kelimpah ari nya, palan pasar basah lama kelalu semak enggau rumah peranak komuniti Melayu mega nyadi pekara ti dikemerat.

Tu laban ku iya, pasar basah nya ungkup pedagang ti nyual dagin babi enggau dagin manuk.

“Nya alai manah agi enti kitai ngiga alai ti patut, lebih besai endur pedagang pemakai basah tu sereta lebih strategik enggau rambai jaku kitai Greater Bau.

“Nya alai aku minta ungkup belanja RM2 juta ari perintah Sarawak, tang nya enda chukup, kitai agi minta tambah RM200,000,” terang iya.

Ngenang pasar basah lama, ku Henry, ia bepanggai ngagai MDB ngemanahka agi nya kena bejalaika aktiviti bukai ke patut.

Henry ngarapka pedagang deka nyaga pemeresi di pasar basah nya ti nyadi aspek beguna kena matak orang datai.

Pasar Basah Bau bisi 12 taba bejual dagin babi enggau enam taba alai nyual dagin manuk.

— Gambar UKAS BEJADI: Henry (tengah) begulai enggau temuai dipebasa bukai begambar bebala mayuh di mua Pasar Basah Bau ti baru dipenyadi di Pekan Bau, kemari.