Sadang penemu nama Aaron pengari Sarawak dalam MTPMA63 udah didraf

Sadang penemu ngeliska Menteri Penyerakup Dato Sri Aaron Ago Dagang nyadi pengari Sarawak dalam Majlis Tindakan Pelaksanaan Perjanjian Malaysia 1963 (MTPMA63) udah didraf, ku Sapit Menteri Besai Dato Sri Fadillah Yusof.

Kelimpah ari nya ku iya, Menteri Pemansang Orang Dagang enggau Koperasi Datuk Ewon Benedick mega udah dilis sama enggau komiti nya ngarika Sabah.

“Taja pia ia agi ba renggat sadang penemu enggau deka dibai ke kabinet (ngambika diperunding),” ku iya madah ngagai pengarang berita ditu kemari, maya ditanya penerang pemadu baru pasal tusun baru mit MTPMA63.

Tusun baru nya digaga pengudah Kaban Parlimen Papar Datuk Armizan Mohd Ali ti sebedau tu megai tanggungpengawa dalam pekara Sabah enggauSarawak,dichirikanyadi MenteriDagangDalamNengeri enggau Kos Pengidup nengah tusun baru kabinet ba bulan Disember taun nyin kemari.

Fadillah ke diatu menteri megai tanggungpengawa pasal pekara Sabah enggau

Sarawak madah, iya ngarapka proses tusun baru MTPMA63 ti benung diatur deka diputarka dalam bulan tu.

“Taja pan aku asal ari Sarawak, aku agi begunaka pengari ari nengeri tu dalam komiti teknikal,” ku iya.

Iya nerangka, nyema iya enda ulih datai nyaut tanya bekaul enggau MA63 di Parlimen, Aaron deka datai ngarika Sarawak.

Fadillah mega madahka ari baruh tusun baru mit nya, siti komiti kereja deka ditumbuh kena nganti komiti penyeraris awakka ulih ngarika pemesai perintah mantai enggau berandauka isu asas.

“Enti isu nya enda ulih diputarka ba renggat nya, ia deka dibai ngagai komiti teknikal enggau kepenudi ngagai Majlis Tindakan Pelaksanaan Perjanjian Malaysia 1963 (MTPMA63),” ku iya.

Dulu ari nya, Fadillah ti disempulang bini iya Datin Sri Ruziah Mohd Tahir nyuaka pemeri ngagai orang tuai enggau orang nyelai pendiau (OKU) nyerumba nyambut Taun Baru China (TBC) di Dewan SUPP di Sungai Tengah, Matang.