Teknologi nambahka asil padi, penatai pemisi nyentuk 60%
Nanam padi ngena teknologi meri asil positif ukai semina ba asil ketau tang mega penatai pemisi orang bumai: Premier
KUCHING: Projek nanam padi ngena teknologi pemadu baru dikena Universiti Putra Malaysia (UPM) di Lubok Punggor di Gedong ulih nambahka penatai pemisi orang bumai nyentuk ngagai 60 peratus.
Premier Sarawak, Datuk Patinggi Tan Sri Abang Johari Tun Openg madahka, nanam padi ngena teknologi asil ari pengawa pemansik UPM nya meri asil ti positif ukai semina ba asil ketau tang mega penatai pemisi orang bumai.
“Enti teknologi ti dikena UPM terus diguna dalam sistem ngeluarka padi di serata Lubok Punggur, ia deka meri penatai pemisi tambah ngagai raban orang bumai sepenyampau 60 peratus ari penatai pemisi sida diatu.
“Pengawa pemansik tu meri asil, enti ia diasilka ngena teknologi asil ari pengawa pemansik UPM tadi, lalu ari tu penatai pemisi orang bumai dipelaba sebulan manggai RM6,400 (sehektar). Tu reti ia enti penatai pemisi (RM6,400) orang bumai kitai udah ba penatai pemisi tengan, ti lalu pansut ari tikas seranta,” ku iya.
Iya madahka pekara nya maya baum pengarang berita pengudah nyadi chairman Mesyuarat Projek Agrihub@ Gedong di Gedong ditu, kemari.
Abang Johari madahka, pengawa pemansik nya ngayanka leka benih padi ti ditanam enggau dikemansangka UPM begulai komuniti lokal udah ngasilka padi ti ulih diketau penyuah lima kali dalam timpuh 24 bulan ke atas ba tanah 5 hektar.
Berindik ari pekara nya, ku iya, projek nanam padi ti ngena teknologi nya deka dikerembaika ngagai kandang menua bukai di nengeri tu seraya ti lalu mantu Sarawak nyapai taga ngeluarka beras Kadar Sara Diri (SSR) iya nya 240,000 tan metrik beras setaun.
“Ba timpuh panjai, aku ngasaika kitai ulih ngamatka pengulih kena diri ngeluarka beras ungkup Sarawak, iya nya urung 240,000 tan, sereta enti dikemansangka ba endur bukai nyengkaum di lebak Limbang, reti ia kitai deka
ulih ngeluarka beras ungkup kandang menua luar ari Sarawak,” ku iya.
Taja pia ku iya kena nyapai taga nya perintah deka dulu ngemansangka infrastruktur betanam betupi nyengkaum di Lubok Punggor, Banting
enggau Lingga di Sri Aman enggau Tanjung Purun di Lundu ti deka dikemansangka enggau pengawa nanam padi ngena teknologi.
Nya alai perintah ku iya udah ngemendarka RM30 juta kena ngemanahka agi sistem parit enggau entali ai ba kandang menua ti bekaul nya, lalu Lubok Punggor deka nyadi model ba kos.
“Kitai deka meda kos ti udah dipejalaika kitai ditu, lalu dikena ba kandang menua bukai kelebih agi ari sukut pemansang parit enggau entali ai. Tu deka ulih nyadika pengeluar padi di serata Sarawak, ti lalu nambahka penatai pemisi orang bumai kitai,” ku iya.
Abang Johari madahka, nama ti pemadu beguna iya nya ngena teknologi dalam ngemansangka pengawa nanam padi baka ti dipansik UPM di Lubok Punggor iya nya sida mega ngena mesin.
“Kitai mega deka ngena mesin sereta mesin nya diempu koperasi ba kandang menua ti bekaul. Sida ulih nyuwa ia ngagai orang bumai ti dekan ngena mesin.
“Reti ia sida ngena teknologi moden kena kitai ngasilka padi,” ku iya.
Enti teknologi ti dikena UPM terus diguna dalam sistem ngeluarka padi di serata Lubok Punggur, ia deka meri penatai pemisi tambah ngagai raban orang bumai sepenyampau 60 peratus ari penatai pemisi sida diatu.