BDDA ngemendarka sekeda projek baru berega RM63 juta

Ejensi Pemansang Bagi Menua Betong (BDDA) udah ngemendarka sekeda projek baru ti begunaka kos sepenyampau RM63 juta.

Nitihka Sapit Premier Datuk Amar Douglas Uggah Embas, projek nya deka dipejalaika dalam taun tu.

Iya madahka ari penyampau nya, sepenyampau RM33 juta udah diungkup kena ngatur aktiviti betanam betupi ti ngasilka penatai pemisi.

“Tu deka bepelasarka betanam betupi ngena chara moden baka fertigasyen enggau hidroponik.

“Latih ti setipak deka diatur ungkup raban nembiak kitai, ke bisi pengerindu ba pekara nya,” ku iya maya bejaku ba pengerami serumpu makai lemai Taun Baru China diatur Gerempung Chung Hua Spaoh di Dewan Masyarakat Spaoh di Spaoh, Betong malam Hari Lima.

Uggah ti mega Kaban Kunsil Nengeri (ADUN) Bukit Saban madahka taba ti pemesai 260 hektar semak padang bilun STOL Bebuling udah diungkupka ngagai betanam betupi nya.

“Kami ngarapka deka nyadi pengeluar mayuh bansa sayur, buah enggau pemakai pemadu dulu di ‘region’ tauka kandang menua ngena mayuh bengkah langgur enggau program kami.

“Ambika chunto, aku mega benung berati deka meri kelala pengawa nupi undang karang, aktiviti baru ti mayuh potensyel di makit ditu mega,” ku iya.

Kelimpah ari nya, iya mega madahka Tebing Sungai Spaoh deka ditangkir ngena belanja sepenyampau RM20 juta.

“Kami deka ke nya lebih besai awakka ulih alai ngatur mayuh aktiviti rekreasyen, pengawa pemandang enggau pemakai tauka mandangka pengawa dagang.

“Kelimpah ari nya, pasar Spaoh baru mega deka dikerembaika nyengkaum alai ruang pasar malam tauka kandang endur medan selera.

“Program nangkir tauka ngemesaika tu deka begunaka belanja RM5 juta. Bisi mega pengawa neruska ngaga mayuh agi lot komersial baru.

“Enti semua tu udah tembu, aku arap bendar Spaoh deka nyadi sebuah mengeri ti terang enggau richah alai diau enggau dilawa,” ku Uggah.

Ngenang pekara bukai, Uggah madahka sebuah palan hemodialisis ti begunaka belanja RM5 juta deka digaga semak enggau Klinik Pengerai Spaoh taun tu.

Iya madahka enti nya udah tembu, pesakit tungkul sengayuh di kandang menua ti besemak nya enda ibuh agi ngelawa palan nya di Debak tauka Betong ke diatu udah sekut endur berubat.

Bekaul enggau isu pengerai, Uggah madahka iya enggau Kaban Parlimen Betong Dr Richard Rapu deka ngulihka belanja ari perintah besai kena ngaga klinik baru ditu enggau siti taba udah ditemu endur kena ngaga nya.

Ba pengerami nya, iya mantaika geran (nyengkaum ari Dr. Richard) sepenyampau RM170,000 kena ngaga mayuh bengkah projek enggau program.

Ia nyengkaum RM80,000 ungkup projek kuil China Spaoh enggau RM60,000 ungkup Gerempung Chung Hua Spaoh.

Nyerumba pengerami nya, Uggah mega bisi nyuaka perais angpau ngagau 46 orang tuai ke datai ngagai pengereami serumpu makai lemai nya.