Perintah nengeri disadang penemu meri bajet KRT rumah panjai
Perintah nengeri ari baruh iring Premier Sarawak Datuk Patinggi Tan Sri Abang Johari Tun Openg diberi sadang penemu berundingka bajet khas Kawasan Rukun Tetangga (KRT) rumah panjai.
Chairman Pengerusi KRT Sungai Pak Sobri Sandom madahka, raban KRT iya nya raban voluntia ti bejalaika program pemaik enggau pengelantang sereta penyerakup, sereta taga program tetap tiap taun ngagai semua rumah panjai ari baruh KRT lalu ngembuan sistem ripot ti chukup enggau akauntabiliti.
“Setipak enggau polisi perintah sehari tu, aku mega meri penemu ngambika ditumbuhka sebengkah Jawatankuasa Bertindak entara perintah nengeri enggau KRT kena ngenegapka pemansang sosial nengah kaul awam entara autoriti lokal enggau komuniti KRT.
“Aku ulih madah, iya nya KRT ‘payung’ peranak rumah panjai ti milih kena nyeliahka ari mayuh sereta setipak enggau deka nyadika peranak rumah panjai kelebih agi penghulu enggau tuai rumah ditaga sekeda orang politik taja pan penyulut servis sida kebendar enda ngemuaska ati sereta jauh bebida ari nama ti dipansutka dalam media rama,” ku iya ba sebengkah penerang, kemari.
Sobri madahka, KRT ukai ‘boneka’ pengawa politik sereta nya kebuah komuniti menua pesisir kelebih agi ti ari baruh KRT patut seruran bepegai tegut ba polisi penyerakup.
Berindik ari pekara nya, iya madahka semua orang patut ninggalka budaya politik sida enti masuk KRT laban KRT iya nya sebuah institusyen bejalaika tanggungpengawa terus kena ngenegapka penyerakup enda ngira latar belakang bansa, jalai pengarap enggau sekalika lelaki tauka indu.
“KRT di rumah panjai enda ulih nyadi ‘boneka’ sereta sepeneka ati nitihka ‘tunjuk’ orang ti ngelinggi, laban kuasa KRT ari baruh Akta Rukun Tetangga 2012 enggau udah ditetapka dalam Undang-Undang Malaysia.
“Nya alai semua kaban komiti (AJK) patut nitihka Polisi Penyerakup Nasional nengah mayuh bengkah opis menteri, ejensi perintah, gerempung ukai dikuasa perintah (NGO) enggau sida swasta ti ngemeratka prinsip tangggungpengawa begulai dalam ngenegapka penyerakup komuniti ti mayuh bansa, jalai pengarap enggau budaya bepelasarka Perlembagaan Persekutuan enggau Rukun Negara”, ku iya.