Sarawak benasit bisi pemesai ngemeratka pengawa ngena BI
Rayat Sarawak amat benasit laban bisi ketuai tauka pemesai ti chukup ngemeratka pengawa ngena jaku English (BI) di renggat sekula primari berengkah ari taun satu nuju ngagai pelajar betikas dunya.
Menteri di Opis Premier Sarawak Dato Sri John Sikie tayai bepenemu, pekara nya patut diperansang ari renggat tumu kena ngemudahka nembiak tu ulih nguasa BI kena betapi penguji bapelajar ti chukup tinggi tikas ia diatu.
“Kitai amat benasit diau di nengeri Sarawak begulai enggau pemesai YAB Premier Sarawak Datuk Patinggi Tan Sri Abang Johari Tun Openg ti chukup beratka pengawa ngena jaku English di renggat sekula primari berengkah ari taun satu nuju ngagai ‘world class education’,” ku iya.
Iya madahka pekara nya maya bejaku ba Majlis Apresiasi Kanak-Kanak Tabika/ Taska Jabatan Kemajuan
Masyarakat (KEMAS) Parlimen Selangau di sebuah hotel ditu, kemari.
Bisi 146 nembiak mit ari 33 Taska enggau Tabika dikerami ba pengerami nya.
Nitihka Sikie, pelajar betikas
dunya iya nya siti komitmen enggau pengeran Opis Menteri Pelajar kena ngemanahka kualiti enggau ngangkatka pelajar menua nuju ngagai standard ti lebih tinggi kena besemekih enggau
menua luar.
Ku iya, nyadi menua ti jampat mansang sektor pelajar patut ngerembai enggau ansat paradigma ti ulih ngepunka alaf baru dalam semua aspek.
“Taja pan kitai diau di menua ulu tang enda mantulka semengat kitai ngetanka nyema kitai amat ulih nguasa jaku English.
“Aku minta semua apai indai ti datai ba pengerami tu sama nyukung pengingin perintah nuju ngagai juluk ba pelajar,” terang iya.
Kaban Kunsil Nengeri (ADUN) Kakus nya madahka, siti ari pemar ditapi nyadi pengajar diatu iya nya ulah sekeda apai indai ti chukup ngemeratka pekara ti dikedeka anak dibandingka enggau dulu kelia.
“Bisi entara ti sanggup ngerembaika siku pengajar semina ketegal pengajar nya ngerara penyalah ti udah digaga anak iya. Aku amat ngarapka apai indai di kandang menua Selangau tebuka runding enggau sesi belajar enggau ngajar diatu,” ku iya.
Sikie madahka, diatu mayuh apai indai ti ngerembaika silibus ti tinggi ba subjek matematik ti engka nguji tikas pengulih anak sida nguasa nya.
“Tapi aku amat pechaya tiap pekara ti udah digaga perintah udah ditisih dulu,” ku iya.
Kelimpah ari nya ku iya, penguji besai ti tusah diseliahka apai indai jeman diatu iya nya penaggul gian peranti ba raban anak kitai.
“Tebal agi apai indai ngambi chara mudah iya nya semina ngemendarka anak bemain gajet enda ngira jam.
“Enda semua penguna gajet meri penanggul, tang enti salah guna ulih ngasuh pelajar anak kitai kusut.
“Nya ali, ulah terit apai indai bekaul enggau penguna gajet amat diguna kena nyekat timpuh anak ngena enggau meda Internet,” ku iya.
Sama bisi datai Penulung Direktor Unit Pelajar Tumu Nembiak Mit KEMAS Negeri Sarawak Roselind Wilson Laing, Penulung Pegawai Tadbir ngarika Pemesai Pelilih Menua Selangau Lau Siong Ho sereta sida bukai.