RM200 juta ari KKDW kena ngemansangka orang dagang menua pesisir Sarawak

KOTA SAMARAHAN: Sarawak nerima ungkup belanja sepenyampau RM200 juta ari Opis Menteri Pemansang Tumpuk Pendiau enggau Wilayah (KKDW) dikena ngangkatka pemansang orang dagang menua pesisir di serata nengeri tu.

Menteri iya, Datuk Seri Dr. Ahmad Zahid Hamidi madahka, belanja khas ungkup Sarawak lalu deka nyadika orang dagang di Sarawak ulih setipak enggau polisi pemansang ti ditetapka opis menteri iya.

“Aku deka madah sepenyampau RM200 juta udah diungkup dikena nentuka langgur enggau strategi pemansang orang dagang baka latih, sukung belanja enggau infrastruktur ulih disediaka iya nya (ungkup belanja) khas ke Sarawak aja.

“Tuju iya dikena ngangkatka kualiti raban orang dagang di Sarawak nengah kerejasama ejensi ari baruh KKDW,” ku iya.

Pekara nya dipadah iya maya pengerami bejadi Mini Karnival Usahawan Desa (KUD)@Kota Samarahan 2024 di Halam Samarahan ditu ensanus.

Sama bisi datai, Sapit Menteri iya Datuk Rubiah Wang; Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah enggau Tuai Sekretari KKDW Datuk Seri Ramlan Harun.

Iya ti mega Sapit Menteri Besai madahka, ejensi ari baruh opis menteri iya ba taun tu bisi ngelanggur sekeda program enggau inisiatif kena mantu orang dagang di Sarawak.

“Ari baruh Majlis Amanah Rakyat (MARA), sepenyampau RM6.5 juta bantu dikemendarka ngagai 39 penerima di Sarawak nengah Skim Pembiayaan Kontrak Ekspres (SPiKE).

“Kelimpah ari nya, Pihak Berkuasa Pekebun Kecil dan

Perusahaan Getah (RISDA) bisi nyendiaka bantu sepenyampau RM3.8 juta ungkup 537 penerima ari baruh program Orang Dagang Nengeri Sarawak.

“Lalu, sepenyampau RM1.4 juta ungkup 7,606 penerima bantu ari baruh Opis Pemansang Komuniti nengah program pemansang komuniti enggau pengelandik sereta RM889,000 ungkup enam penerima ari Bahagian Usahawan Desa, KKDW nengah Skim Pembiayaan Ekonomi Desa (SPED),” terang iya.

Berindik ari pekara nya, iya ngarapka kerejasama ti manah ulih diteruska entara KKDW enggau perintah Sarawak.

“Kitai ulih ngereja sesebengkah pekara enggau lebih manah, lalu ngena amat aku mega Chairman Majlis Usahawan Malaysia enggau Majlis Halal Malaysia.

“Kitai mega bejalaika penyerakup enggau integrasyen orang dagang tu awakka kitai ulih nengkebang produk ti bisi standard di renggat antarabansa nengah pengawa pemandang ti diatur KKDW enggau ejensi ari baruh iya,” ku iya.

Berebak enggau tu iya madah diri arap bendar Sarawak bisi penyelai ba produk ti nadai ba nengeri bukai.

“Aku besemaya deka nyual produk nyelai ti diasilka di Sarawak di makit antarabansa,” ku iya.

Kelimpah ari nya, Ahmad Zahid mega muji pengeran perintah Sarawak ti seruran bebendar dalam nyungkakka pemansang ekonomi di nengeri tu.

Iya madahka, tiap genturung pendiau di nengeri tu deka diberi ungkup belanja tambah ungkup pemansang ekonomi sepenyampau RM50,000 ngagai RM100,000.

“Nambah nya, aku mega deka mantu enda ngira nama ti diguna peranak Kota Samarahan,” ku iya.