Sarawak bisi penegap ngemansutka energi ulih dikemaru
Dalam nentuka pemujur enggau pemansang ekonomi nyengkaum kuasa hidro, energi solar, pemansut hidrogen
KUCHING: Sarawak patut ngena memanah penegap dalam ngemansutka energi ti ulih dikemaru dalam nyungkak pemansang ekonomi, ku Premier Datuk Patinggi Tan Sri Abang Johari Tun Openg.
Ku Abang Johari penegap Sarawak iya nya ba pemisi energi, nyengkaum kuasa hidro, energi solar, pemansut hidrogen enggau chara energi hibrid entara energi angin enggau solar.
“Ba penemu aku ungkup Sarawak, kitai mesti nemu pengering kitai lalu baru mih kitai ulih mansang ke mua. Kitai mesti ngaga analisis pengering kitai lalu mekuh ngagai nya,” ku Abang Johari.
Iya madah munyi tu lebuh ti bejadika pengerami nutup Aum Besai Opis Tanah enggau Survei Sarawak 2024 ba Palan Konvensyen Borneo Kuching (BCCK), kena malam Hari Enam.
Premier Sarawak
Ku Abang Johari nambah, projek bukai ti bekaul energi ulih dikemaru ti dimunka nengeri tu nyengkaum inisiaitif ngulihka, nguna enggau nyimpan karbon (CCUS) ti nyendiaka siti agi pun penatai pemisi ngagai perintah.
Sarawak ku iya dulu ari nengeri bukai di menua tu dalam agenda energi ulih dikemaru lalu undang-undang nengeri udah diubah ngambika seruran dikemaru enggau guna pemadu baru dalam dagang, sereta setipak enggau juluk pemeruan rampa menua.
Kelebih agi, iya ngembuan juluk ngagai Sarawak jemah ila nyapai pemujur ekonomi baka Bavaria, nengeri ti ngembuan tanah pemadu besai di Jerman, lalu energi ulih dikemaru deka nyadi pemun pemansang ekonomi Sarawak.
“Nyema Sarawak lantang, Malaysia mega deka enggau sama sekali mujur,” ku Abang Johari.
Kelimpah ari tu, Abang
Johari madahka Sarawak ulih dalam nyendiaka pelajar ti enda bebayar ngagai rayat
Sarawak ti belajar ba universiti ke dipenggi perintah nengeri maya datai ba taun
2026.
Iya mega dama ngelaluka pelin Opis Tanah enggau
Survei Sarawak (LANDAS) dalam matau pelantar kandang menua Sarawak dalam nyaga pemerat ekonomi.
Ba pengerami tu Abang Johari mega ngemendarka agih belanja sepenyampau RM5 juta ngagai LANDAS ungkup tuju latih enggau pemansang modal mensia.
Iya mega nyuaka trofi pemenang LANDAS dalam International Convention in Quality Control Sircle (ICQCC) 2023 ke udah diatur ba Beijing, China.
Sama bisi datai iya nya Sapit Permier Sarawak Datuk amar Douglas Uggah Embas enggau Datuk Amar Dr Sim Kui Hian, Sekretari Perintah Nengeri Datuk Amar Mohamad Abu Bakar Marzuki, Sapit Menteri Ngelangkar Pemansang Mengeri, Ngatur Tanah enggau Rampa Menua Datuk Len Talif Salleh enggau Direktor Opis Tanah enggau Survei Sarawak Datuk Abdullah Julaini.
“Ba penemu aku ungkup Sarawak, kitai mesti nemu pengering kitai lalu baru mih kitai ulih mansang ke mua. Kitai mesti ngaga analisis pengering kitai lalu mekuh ” ngagai nya. Datuk Patinggi Tan Sri Abang Johari Tun Openg