S.R.I ngemeranka pemeruan nguntungka 88 orang bumai di Ba’Kelalan
KUCHING: Sistem Intensifikasyen Padi (S.R.I) teulihka pemujur ti besai reti berindik ari mujur mantu 88 orang bumai di Ba’Kelalan, Sarawak.
S.R.I iya nya projek betanam betupi ti meruan disukung Tabung Alam Sedunia Malaysia (WWFMAlaysia) enggau CIMB Islam Bank Berhad (CIMB Islamic).
Nitihka WWF Malaysia, ba taun 2017, projek rintis dipunka di Long Langai, sebuah ari genturung pendiau ke bisi di Ba’Kelalan, ti bekaul enggau semina 12 orang bumai, sereta diatu udah ngerembai ngagai empat genturung pendiau ti semak, iya nya Buduk Bui, Long Rangat, Long Lemutut, enggau Long Kumap.
Prinsip S.R.I ti ngemeratka pengawa betanam betupi enda ngena substans kimia enggau mantu ngurangka indu utai tauka jelu perusak kelebih agi tekuyung gondang emas udah nerima sukung positif ari raban orang bumai ba kandang endur nya.
Pemujur inisiatif S.R.I mega ngayanka komitmen enggau dedikasyen tinggi orang bumai ti nyadi peransang besai ngagai penyulut projek tu.
Dalam kerejasama ti chukup ngemegah ati nya, sida besaup ari baruh iring Raban Pengereja Khas S.R.I nengah chara bekunsi penemu pasal bejalaika betanam betupi ti manah, ngembing orang bumai baru enggau ngena prinsip ti beguna baka pemeruan rampa menua.
Ba pengerami ti diatur apin lama, Chairman Pengereja Khas S.R.I Ria Gugkang Sakai begulai enggau Direktor Bersekutu Sarawak dan Sains Pemulihan WWF-Malaysia Dr. Jason Hon, Direktor Urusan Antares Ventures Brendan Kon sereta pengari ari CIMB Islamic bejadi bilik stor S.R.I.
Stor S.R.I entara pengulih pemadu beguna ti ngelai penegap komuniti ti nadai ngetu.
Raban Pengereja Khas S.R.I deka ngemataka operasyen bilik stor kena nentuka semua orang bumai S.R.I nitihka garis lalau ngena fasiliti nya.
Fasiliti tu fungsyen ia nyadi sumber beguna alai nyimpan mesin, proses enggau
nyimpan padi.
Kepala Pegawai Eksekutif CIMB ISlamic, Ahmad Shahriman Mohd Shariff madahka, CIMB Islamic terus fokus ngagai pemeruan ngena chara ngemeranka garis lalau enggau prinsip intermediasyen bepelasarka tisih dalam tiap pekara ti dipejalaika.
“Kami temegah ati enggau kerejasama bakih ti sepenemu
deka mai ubah positif ti entap ngagai komuniti. Kami gaga ati sekali agi nyadi penyungkak inisiatif komuniti begulai enggau WWF-Malaysia nengah projek bumai S.R.I.
“Inisiatif tu udah meri penguntung ngagai pengidup orang bumai ba kandang menua Ba’Kelalan, sereta ngayanka sinergi penguntung ari kerejasama meruan enggau asil pengawa komuniti,” ku Ahmad.
Kelimpah ari nya, Dr. Hon madahka pemujur inisiatif nya, iya nya asil kereja sereta komitmen tinggi orang bumai.
Penyereta aktif sida enggau pemansang projek tu ba genturung pendiau, ngayanka penyulut chara nyaga ti diiring komuniti, ku iya.
Dr. Hon madahka projek tu mega mai pengidup orang bumai sereta meransang nyaga sereta tanggungpengawa ngagai rampa menua ba kandang endur nya.
“Sukung ari CIMB Islamic Bank Berhad enggau ejensi bukai, kami udah bejalaika mayuh aktiviti.
“Entara aktiviti ti udah dipejalaika kami nyengkaum masang paip ba entali
ai di kandang endur Long Langai enggau Long Lemutut, lalu tiga genturung pendiau bukai di Long Rangat, Buduk Bui, enggau Long Kumap dipelaba deka tembu enda lama agi.
Chara ngurus ai iya nya aspek besai dalam S.R.I. Nya alai, paip tu amat beguna,” ku Dr. Hon.
Bejaku baru iya madahka enda ngira sapa ti meli beras ti ditanam ngena chara S.R.I di Ba’Kelalan, ulih meri pengarap sida ukai semina mai pemanah ngagai bumai meruan tang mega nyaga
rampa menua nengah chara kolektif orang bumai.
Ba penemu RIa, peranak di Ba’Kelalan ti ngambi bagi dalam S.R.I ukai semina ngangkatka chara bumai enggau ngubah gaya umai sida, tang mega ulih meri tanggungpengawa nyaga rampa menua.
“Kami temegah ati nyukung chara betanam betupi meruan di genturung pendiau kami.
“Kami meda pemansang S.R.I di Ba’Kelalan ari sebuah genturung pendiau ngagai empat. Stor S.R.I
iya nya siti ari pemujur ti ngayanka pengering kolektif enggau penyerakup komuniti kami,” ku iya.
Projek nanam padi S.R.I iya nya chunto pemadu manah kerejasama entara komuniti lokal, bakih korporat, enggau organisasyen pengawa nyaga kena meri impak positif ngagai mensia enggau rampa menua.
Ia nempa situasyen menang-menang orang bumai enggau ekosistem ti nambahka asil padi, seraya lalu nambahka penatai pemisi orang bumai enggau ngurangka pengawa merimba kampung.
Enda ngena substans kimia mega ulih mai ngagai pengawa nyaga pemeresi sungai enggau ngurangka empas negatif ngagai rampa menua.
Kelimpah ari nya, projek tu nyendiaka paip bekilometer ungkup entali ai ari bukit ngagai umai, dikemansangka orang bumai ngena chara gotongroyong.
Pengawa matau ti dipejalaika WWF-Malaysia ngayanka kandang endur nakung ai Ba’kelalan urung 7,000 hektar agi dibungkur kampung gadung.