Raban nembiak ti nyulut kunchi pemujur menua jemah ila: Tiang
Ngenegapka raban nembiak iya nya kunchi ngagai pemujur jemah ila, ku Sapit Menteri Pengerami Mensia Mayuh, Pengawa Berumah enggau Kaunsil Kandang Menua Datuk Micheal Tiang Ming Tee.
Beserimbai enggau tu, ku iya, Pertubuhan Belia Kebangsaan Bersatu Sarawak (SABERKAS) Pampang Pelawan diatu benung chakah nambahka kaban ari bala nembiak ngambika sama ngaul diri enggau mayuh macham program sereta aktiviti ti diatur sida.
“Dalam jaku aku, aku ngemeratka iya nya kitai semua ngarapka Sibu ngembuan pemujur jemah ila ti manah agi.
“Dikena nyapai tu, kunchi nya bisi ba raban nembiak kitai. Meri kuasa ngagai sida endang beguna dalam pemansang raban rebak tu,” ku iya ti mega chairman SABERKAS Pampang Pelawan.
Iya madah munyi tu lebuh ti ditemu pengarang berita pengudah bejadika pengawa nutup Bazar Taun Baru China (TBC) ti diatur SABERKAS Pampang Pelawan ba tengah laman belakang begunan CCK Local, ditu bedau lama ti udah.
Kaban Kunsil Nengeri (ADUN) Pelawan madahka, pengawa ngatur bazar tu enda mekuh ngagai aktiviti bejual aja tang sama dirichahka enggau aktiviti bukai baka pekit betanda, belagu enggau ke bukai.
Platform baka tu ku iya, ulih meri peluang ngagai bala nembiak mantaika pengelandik sida sereta mantu sida ngiga identiti sida empu.
“Kami meri sida peluang dalam ngatur, belajar bekerejasama enggau bemacham raban lalu ngangkatka tikas pechaya ngagai diri empu.
“Tu mantu sida nemu enggau ngelala diri empu, nemu sapa sida kebendar,” ku iya.
Beserimbai enggau tu, Tiang madahka lebih 20 bansal bejual mayuh macham pemakai enggau ai irup sereta barang bukai bisi dibuka ba bazar TBC ke udah berenkgah bejalaika operasyen kenyau ari 26 Januari nyin tadi.