Komuniti dilalau enda nerima ideologi ‘ekstrem’ ti ulih mambarka penyerakup
LIMBANG: Komuniti dilalau enda nerima penemu enggau ideologi ekstrem ti ngerembai dalam media rama laban nya ulih ngasuh teguran enggau penyerekang tauka pambar.
Sapit Premier Sarawak, Datuk Amar Awang Tengah Ali Hasan madahka penemu enggau ideologi ekstrem tu patut ditulak laban nya nyata bendar ngelaban ajar jalai pengarap Islam.
“Kitai enggai ke komuniti kitai tepejuh runding enggau mayuh pekara enda manah ti dikerembai tauka dibai dalam media rama.
“Kitai patut bebendar nulak pekara ti enda manah tu laban nya ulih ngujungka komuniti tepejuh runding, kelimpah ari ulih ngeruga pengarap komuniti, laban ia ulih ngasuh belaya enggau bepechah dalam ruang bilik enggau komuniti,” ku iya.
Iya madahka pekara nya ba Program Persembahan Zikir Marhaban Lembaga Amanah Kebajikan Islam Limbang (LAKIL) di Masjid Datuk Pengiran Haji Matusin Kampung Dato Kuala Lawas, apin lama.
Sama bisi datai Kaban Parlimen Lawas Datuk Henry Sum Agong, bini Awang Tengah
Datuk Dayang Morliah Datuk Awang Daud, Residen Bagi Menua Limbang Yunus Tambi, Pemesai Pelilih Menua Limbang, Sekretari Politik ngagai Premier Sarawak Awangku Jinal Abidin Dato Pengiran Jawa, Treasurer LAKIL Mahmud Amit enggau temuai bukai.
Awang Tengah ti mega Menteri Pengeraja Asal enggau Pemansang Mengeri Kedua enggau Menteri Dagang Antarabansa, Industri enggau Meranak Puku madahka jalai pengarap Islam ngajar pemaiak enggau
pengelantang.
“Jalai pengarap Islam ngajar sama ratam enggau nadai ajar jalai pengarap ti ngajar kitai bepechah sereta belaya enggau pangan diri ti pengujung ia ulih ngeruga jalai pengarap kitai empu,” ku iya.
Bejaku baru iya madahka mayuh kereban disediaka perintah kelebih agi ngagai isntitut jalai pengarap dikena ngatur program bekaul enggau jalai pengarap ti mai ngagai penyerakup enggau ngenegutka ukhwah tauka kaul.
“Aku chukup temegah ati taja mayuh pengurang
di Masjid Kampung Dato Kuala Lawas, tang masjid tu ulih ngatur mayuh bengkah program jalai pengarap.
“Sereta program jalai pengarap tu mega ukai semina dipasuk perenak lokal tang nyengkaum sida ke datai ari Brunei, Sabah sama ngambi bagi adalam pekit ‘zikir’, ‘hadrah’ enggau mayuh aktibi jalai pengarap bukai,” ku iya.
Ba program nya, urung 100 ‘penzikir’ LAKIL Limbang ari sembilan buah genturung pendiau Isalam di Limbang masuk program tu.