Projek ngangkatmanah Jalai Oya dipelaba tembu ujung taun tu
Projek ngangkatka pemanah Jalai Oya ke patut nya tembu ujung taun nyin kemari, diatu ditimpuh ulih ditembuka ba bulan November tauka Disember taun tu.
Sapit Menteri Pengawa Berumah enggau Pengerai Mensia Mayuh, Datuk Michael Tiang madahka, pengawa mindahka tali kabel utiliti baruh tanah ti bebalut iya nya pemar besai dalam dalam projek nya, ti ngujungka penusah dalam pemansang projek nya.
Ku iya, taja pan ripot ngayanka tembu 100 peratus dalam sekeda aspek, projek tu tetap betapi pemar sereta begunaka perati khas.
“Bepelasarka pengawa meresa ti pemadu baru, komponen jalai alun enggau sistem parit iya nya pekara pemadu dikemerat.
“Taja pan pemadang projek udah manggai 64 peratus, tang tetap agi bisi pengirau, kelebih agi dipelaba agi bisi kabel baruh tanah,” ku iya.
Iya madahka pekara nya maya dirandau raban pengarang berita ba pengerami serumpu makai lemai begulai enggau media nyerumba ngintu Taun Baru China, malam ensanus.
Tiang madahkam projek ngemanahka agi jalai lama iya nya pengawa ti tusah, begunaka langgur ti silik, enggau belanja ti chukup.
“Sida kontrektor mega ngaku pemar ditapi peranak ti diau semak enggau taba projek.
“Bekaul enggau pengelikun, baka masang pagar, benung diperundingka kena mutarka pengirau bekaul enggau struktur ti runtuh enggau nentuka pengelantang pendiau sida ti diau semak enggau projek tu,” terang iya.
Tiang nambah nya madahka, taja pan betapi enggau pemar tauka penusah, kontrektor ti megai tanggungpengawa ngaga projek nya diripotka agi komited ngaga projek nya.
Tiang bebendar madahka, sida iya mega daka matau enggau semak pemansang projek nya kena nyeliahka ari lubah tembu.
Ku iya, iya ngelanggur bekunsi penerang pemadu baru pasal projek nya ba bulan Aprik ke deka datai, sereta ngarapka semua isu ti nyadi ulih diputarka, enggau projek terus mansang nuju juluk nembuka projek nya.