PMSB nyendiaka 60 peratus pengereja pengawa dalam bidang kapal ba taun 2025
MIRI: Akademi Maritim Pelita Maslaut (PMSB) naga nyendiaka 60 peratus raban pengereja pengawa dalam bidang kapal lebuh manggai taun 2025.
PengarahUrusanKumpulan Pelita Mas Laut, Masni Amit madahka, naka kediatu bidang nya ti dikuasa raban pengeraja pengawa menua luar taja pan pengaji iya kompeni lokal.
“Kitai arap bendar enti raban pengereja pengawa lokal diberi latih enggau pengelandik dalam bidang maritim, sida mega ulih besemekih enggau raban pengereja ari luar,” ku iya maya nerima kadet marin dek kapal siri ke-39 ditu, kemari.
Akademi nya ku iya udah nempa lebih 5,000 raban pengereja pengawa bidang profesional marin kenyau ditumbuhka ba taun 2006.
Bejaku baru iya madahka PMSB udah bejalaika tanggungpengawa beguna kena ngajar enggau ngelatih ngena chara nyendiaka modul kus ti efisyen enggau bekualiti ke guna raban pengereja enggau
sumber dalam bidang maritim.
“PMSB udah nempa raban kelasi/pelaut enggau pemesai marin ti profesional, landik enggau pandai tauka bepenemu baka ti diaku Piawaian Jabatan Laut Malaysia dan STCW (Standards of Training, Certification and Watchkeeping) ari baruh International Maritime Organization.
“Nya alai, enggau tanggungpengawa nya Institut Latihan Pelita Maslaut deka terus ngenegapka agi tanggungpengawa
nyadi pelasar besai ti ngelatih enggau ngajar raban biak Malaysia kelebih agi di Sarawak masuk bidang maritim,” ku iya.
Masni mega beterima kasih ngagai Yayasan Sarawak ti mantu nyendiaka bantu pelajar ngagai nembiak Bumiputera kena nampung pelajar dalam bidang maritim.
Bisi 18 iku pelatih ti nyengkaum kadet marin dek ari Kuching, Lawas, Baram enggau Miri udah ngambi kus nya.
Pelatih deka diberi kus teori pengelama tiga bulan sereta ditangkan latih praktikal pengelama lapan bulan begulai enggau kompeni kapal.
“Nyema sida ngayanka pengeran maya latih industri, sida bisi peluang dipasuk tauka diambi pengaji nya gawa,” ku iya.
Sereta enggau sukung ari industri enggau kompeni kapal Malaysia ku iya, PMSB ngarap ulih meda lebih mayuh rayat Malaysia gawa ba kompeni kapal Malaysia.