KUTS fasa keterubah ngaga depot ART di Rembus dipelaba tembu ujung taun 2025
Nangkanka tu depot tu disadang deka berengkah bejalaika operasyen kena pun taun 2026
Kami ngarapka projek tu (depot ART Rembus) tu ulih dipejalaika enggau lanchar sereta tembu nitihka timpuh ti udah ditetapka nya pemadu beguna. Kitai enggai meda projek tu lubah enggau sebarang tegal projek tu lubah.
KOTA SAMARAHAN: Projek Sistem Perengka Pengangkut Mengeri Besai Kuching (KUTS) fasa keterubah iya nya ngaga depot Transit Aliran Automasi (ART) di Rembus ditu disadang tembu ujung taun 2025, sereta dipelaba berengkah beoperasyan pun taun 2026.
Menteri Perengka Pengangkut Sarawak, Dato Sri Lee Kim Shin madahka projek nya begunaka belanja urung RM260 juta nya bisi enam komponen nyengkaum woksyop mekanikal; woksyop infrastruktur; ‘operation control centre’ (OCC) enggau ‘admin building’; stesyen ngisi hidrogen, ‘stabiling yard’ enggau ‘test track’.
Iya madahka taba projek depot Rembus nya udah diberi ngagai kontrektor Azam Sehasrat Sdn Bhd, IJM Construction Sdn Bhd sereta Unique Deco Sdn Bhd enggau usahasama Sarawak Metro kena 8 Disember 2023 sereta kemari (6 Februari 2024)berengkah enggau pengawa cerucuk(first pili) ba bengkel mekanikal.
“Kami ngarapka projek tu (depot ART Rembus) tu ulih dipejalaika enggau lanchar sereta tembu nitihka timpuh ti udah ditetapka nya pemadu beguna. Kitai enggai meda projek tu lubah enggau sebarang tegal projek tu lubah.
“Projek tu ditimpuhka tembu sereta diserahkan enggau beoperasyen tauka berengkah nyendiaka servis iya nya garis biru (ari Rembus ke Riveria) ba ujung bulan Disember 2025.
“Kebendar nya projek tu deka tembu semua ba ujung taun 2025, lalu pengudah kitai tembu nguji enggau kebukai, nya alai kebendar nya ba pun taun 2026 kitai ngarapka udah ulih nyendiaka servis nya tauka beoperasyen,” ku iya.
Lee madahka pekara nya lebuh dirandau raban pengarang berita maya iya ngabas taba projek depot ART Rembus ditu, ti disempulang raban injinir sereta bala pemesai opis menteri iya, raban ari Sarawak Metro enggau sida kunteriktor, kemari.
Projek ngaga depot Rembus di Kota Samarahan ba tanah pemesai urung 54 ikar nya dibagi ngagai lima zon, sereta lima zon nya dalam mayuh renggat pemansang ari 13.39 peratus ngagai 70.60 peratus.
Kelimpah ari bisi sekeda komponen besai, depot Rembus
nya mega ngena integrasyen mayuh sistem nyengkaum trek maya, kereban isyarat, kereban telekomunikasi, ngumpul bayar tambang automatic, operasyen pengangkut hidogen, servis M& E enggau kebukai.
“Opis menteri aku enggau Sarawak Metro deka matau projek tu, laban udah bisi kontrak disain nya kebuh kitai ngarapka sida ulih napi
semua ke dipinta nitihka spefikesyen enggau kontrak.
“Kami deka matau projek tu enggau silik laban kitai bisi timpuh ti chukup serekat laban semua kereban tu mesti ditembuka sebedau tauka maya ART datai, enti kereban enda tembu kitai nadai ulih beoperasyen. Nya alai semua patut sereta tembu, semua fasa enggau ART kitai mega mesti tembu,” ku iya.