1.13 juta hektar NCR di Sarawak udah disukat kelingi beraban
Urung 1.13 juta hektar tanah Hak Adat Bansa Asal (NCR) di nengeri tu nengau pengawa nyukat kelingi beraban ari baruh Seksyen 6 Kanun Tanah Nengeri.
Sapit Premier Sarawak Datuk Amar Douglas Uggah Embas madahka tu iya nya anggar ari dua juta hektar tanah NCR nyentuk ke diatu.
Iya madah munyi tu sebedau nyuaka duit pampas sepenyampau RM3.171 juta ngagai 59 iku pengempu tanah NCR ari dua buah kandang menua di Betong ke alai tanah sida udah kena pansa dua projek ngaga jalai alun.
Ku iya madah ungkup bagi menua Betong aja, bisi 14,322 hektar udah disukat lalu lebih 85,000 hektar udah digazet ari baruh Seksyen 6 naka ke diatu.
“Tu iya nya ari penyampau 174,342 hektar ke dipinta pengempu tanah ngambika disukat. Tang pia mega, kami ngembuan urung 16,900 hektar ke pengempu nya udah nulak proses tu laban ti udah kena rachun runding ari sekeda raban,” ku iya.
Uggah nandu baru madahka pengawa nyukat Seksyen 6 iya nya pilih ti jampat agi dalam nisih tanah NCR asal ari tanah nengeri.
Ku iya madah, lebuh tanah tu udah disukat ari baruh Seksyen 6, perintah deka ngenukuka tu nyadi tanah NCR.
“Lebuh perintah ngulihka tanah NCR ungkup sebarang tuju pemansang, sida deka mayar pampas bepelasarka tikas pengulih Opis Tanah enggau Survei (JTS) nyengkaum utai
tanam enggau infrastruktur ke bisi dia.
“Nadai sekali bisi isu perintah
ngerampas tanah tu enggau nadai meri pampas. Selalu nya kami deka ngembuan
penanggul ti mit tauka nadai penanggul sekali enggau tanah NCR ti bisi orang ngempu.
“Tang kitai selalu nya deka betapi enggau sekeda isu enggau sida ti nadai ngembuan surat pala tanah,” ku iya.
Uggah muji Opis Tanah enggau Survei ti udah bebendar dalam proses nyukat beraban laban tu udah diatur enggau chukup manah.
Ba pengerami tu iyaudah madahka geran perintah RM1.8 juta ungkup ngangkatmanah Opis Residen Betong lalu meri RM200,000 agi ungkup Opis Pelilih Menua Betong.
Sapit Menteri Pemansang Mengeri, Pengawa Ngatur Tanah enggau Rampa Menua Datuk Len Talif Salleh dalam jaku pengelalu iya madahka perintah nengeri diatu endang komited dalam mai pemansang ngagai kandang menua pesisir nengeri tu setipak enggau Strategi Pemansang Pengudah COVID19 2030.
Berindik ari tu, ku iya, tu begunaka tanah ungkup ngana mayuh agi jalai alun, perengkaguna mensia mayuh, projek bekal elekterik enggau ai, menara telekomunikasyen enggau ke bukai.
“Tu reti nya kitai begunaka NCR enggau tanah ti diempu orang siku-siku tang pechaya mih, kami deka mayar pampas enggau enda bechiping,” ku iya.
Sama bisi iya nya Kaban Kunsil Nengeri (ADUN) Layar Dato Gerald Rentap Jabu, Kaban arlimen Betong Dr Richard Rapu, Sekretari Politik Premier Sarawak Roseline Mapong, Residen Betong Richard Micheal Abunawas enggau bala bukai.