Pelajar nyadi pelasar ti engkeman dalam pemansang, penyulut sebuah menua
Bidang pelajar iya nya pelasar ti besai ngagai pemansang enggau penyulut sebuah menua, ku Kaban Parlimen Sri Aman Datuk Seri Doris Sophia Brodie.
Jeman diatu ku iya, deka besemekih dalam pengidup, tetiap rayat patut ngembuan tikas pelajar ti tinggi awakka ulih nitihka standard dunya sereta udah nya ulih bediri sama tinggi duduk sama baruh enggau komuniti luar tauka dunya.
Nya alai ku iya, kena nentuka anak kitai ba tikas standard dunya nya, inovasyen enggau pemansang pelajar ti endang dikemeratka belama.
Doris madahka pekara nya lebuh bejaku bejadi Hari Apresiasi Kanak-Kanak Tabika dan Taska Jabatan Kemajuan Masyarakat (KEMAS) Bahagian Sri Aman Sesi 2023/2024 di Dewan Suarah Sri Aman ditu, kemari.
Nitih ku iya, pemujur enggau penyulut ti dijapai nembiak ukai pekara ti datai kediri enti nadai iring enggau embing ari pengajar.
Pengeran bala pengajar,enda ulih dipeda nyadi bidang kereja aja laban pengawa sida lebih ari nya.
“Ba penemu orang luar ti ukai dalam tabika tauka taska tauka apin indai, ba sida pengajar iya nya ngajar tang kebendar ukai semina naka
nya, sida ngajar anak ngena pengelandik bukai baka begulai, bekomunikasyen, pemanah ulah enggau norma idup dalam komuniti awakka anak tu ulih ngatika diri enti pansut ari tabika tauka taska sereta mega enti abis belajar renggat sekula enggau pelajar tinggi jemah ila,” ku iya.
Taja pia iya bepenemu tanggungpengawa meri pemandai, pengelandik sereta peneleba nya ukai patut semina dilempaika ba bala pengajar tabika tauka taska tang begunaka penegap ari apai indai enggau ari rumah.
“Kebendar iya apai indai bisi tanggungpengawa baka nentuka anak nandu baru
pekara ti diajar ba rumahm nentuka anak chukup asi sukut perengka asas, likun, lantang, gerai dalam semua aspek pengidup.
“Anak ti chukup ba semua pekara nya ukai semina nyulut ba pengidup sida tang mega enda mudah tepuruk ngereja pekara ti enda manah.
“Nya alai, tanggungpengawa apai indai ukai patut dipeda pekara ti mit ari apai indai,” ku iya.
Doris bejaku baru madahka, dalam pengeran kitai ngajar anak ngambika ulih nyadi mensia ti beguna jemah ila, kaul entara pengajar enggau apai indai mega amat beguna.
Kelimpah ari nya, lebuh ti ngenang tanggungpengawa Komiti Tabika enggau Taska amat beguna dikena nentuka ulih ngelangkar program tauka aktiviti dikena ngemajuka pelajar anak seraya sama besaup napi penanggul ti nyadi.
Sama bisi datai ba pengerami nya, Pegawai KEMAS Bahagian Sri Aman Marinda Stewart Thaim, pengari Residen Bahagian Sri Aman Faizal Asi, Ketua Balai Bomba dan Penyelamat Sri Aman Andrew Vengitasamy, pengari Pegawai Kesihatan Bahagian Sri Aman Zaifa Johari sereta pengari KEMAS Sri Aman.
Ba pengerami tu bisi 170 iku nembiak Tabika enggau Taska KEMAS Bahagian Sri Aman ari 34 tabika enggau tiga taska di Sri Aman nerima setipikit enggau perais.
Objektif pengerami nya dikena meri peransang ngagai bala nembiak dalam bidang akademik enggau kurikulum sereya meransang ngambika regas alam aktiviti kokurikulum ba semua renggat sereta kena nempa penyulut dalam akademik, kurikulum sereta sahsiah awakka ulih besemekih.
Ba pengerami nya, Doris meri geran sepenyampau RM6,000 ngagai KEMAS Sri Aman kena ngatur enggau nyukung program diatur KEMAS Bahagian Sri Aman.