SABERKAS gerempung ti nempa ketuai baru ari pupu bansa

Pertubuhan Belia Kebangsaan Bersatu Sarawak (SABERKAS) sebengkah gerempung endur nempa ketuai baru ti enda ngira bansa, pengarap sereta bida politik ti ulih mai Sarawak lebih maju dudi hari.

Presiden gerempung nya, Dato Sri Abdul Karim Rahman Hamzah madahka sukung raban nembiak Sarawak ari sukut bansa sekalika Dayak, China, Melayu, Orang Ulu sereta bansa bukai chukup mayuh.

Ku iya pekara nya ulih dipeda maya baum besai tiga taun sekali gerempung, ti bisi nunjukka sukung tinggi ari raban tauka ketuai raban nembiak sereta chukup ngemegahka ati.

“Diatu kitai ulih meda nadai suku kaum tinggal ari mega penuduk dalam komiti pemadu tinggi SABERKAS tu. Saberkas tu nadai bekaul enggau politik, laban enda ngira sekalika sida nya dalam penyakal tauka Gabung Parti

Sarawak, semua bisi dalam SABERKAS.

“Sida ti kala ngelaban kitai (dalam politik) mega bisi dalam TGM SABERKAS, tauka sida ti ari parti ngelaban kitai mega bisi, tu ngayanka SABERKAS nadai bekaul enggau pekara politik.

“Ditu (SABERKAS) endur kitai nempa kepimpinan baru Sarawak, iya nya semua suku kaum ari mayuh bansa enggau pengarap ulih duduk semija, sereta kitai bebendar deka ngemansangka raban nembiak nengah SABERKAS kena nyadikan Sarawak ditau lebih maju agi jemah ila,” ku iya.

Iya ti mega Menteri Nembiak, Lumba enggau Main, sereta Pemansang Orang Dagang madahka pekara nya maya baum pengarang berita pengudah iya nyadi chairman aum Jawatankuasa Tertinggi SABERKAS ti diatur ba Hotel Hilton ditu, kemari.

Bekaul enggau pekara dikerandauka, Abdul Karim madahka sida udah ngaga pemutus sereta numbuhka semilan komiti mit iya nya Komiti Mit Pekara Wang enggau Ngatur Aset; Adminstrasyen enggau Ngatur; Lumba enggau Main, Rekreasyen enggau Main Asal; Pemansang Orang Dagang enggau Ekonomi; Pemansang Modal Mensia; Betanam, Betupi enggau Asas Tani; Sains, Teknologi enggau Inovasyen; Pekara Indu; enggau Komiti Mit rama enggau Pengelantang.

Iya madahka diri temegah ati ngagai kereja ti dipejalaika komiti mit semanjai tiga taun ke udah kelebih agi maya ngintu genap 50 taun SABERKAS udah ditumbuhka.

Menteri Dagang Temuai, Industri Kreatif enggau Seni Pemerindang nya mega madah dalam timpuh setaun ke udah SABERKAS mujur ngatur lebuh 700 bengkah program enggau aktiviti di serata Sarawak, ti tebal agi diatur ujung minggu enda ngira alai di nengeri tu.

“Tu (program enggau aktiviti) udah matak pengerindu enggau sukung raban nembiak ngagai SABERKAS kelebih agi sida di menua pesisir, laban sida ulih meda tanggungpengawa ti dipejalaika sekalika dalam program lumba enggau main, komuniti, program pengibuh enggau mayuh program bukai.

“Maya baum tadi kami mega bisi berandauka aktiviti ti deka diatur taun tu sereta kami enggau naka ulih mari nembiak Sarawak ti ukai semina ari sukut perspektif Sarawak aja, kitai deka ke tuai nembiak Sarawak ngambi bagi ba program di luar.

“Opis Menteri aku ti bekaul enggu nembiak sereta lumba enggau main, kami deka bekerejasama enggau SABERKAS mai baka pemesai nembiak SABERKAS nuju ngagai lebih tinggi sekalika dalam renggat nengeri, nasional enggau renggat antarabansa,” ku iya.