Pandelela dikelalu mantu ngangkatka atlit Sarawak nyulut dalam lumba, main terjun
Menteri Nembiak, Lumba enggau Main, sereta Pemansang Orang Dagang nyukung nyema ‘Ratu Terjun’ Malaysia Dato Pandelela Rinong milih deka mantu ngangkatka raban nembiak tauka atlit Sarawak manah tauka nyulut dalam lumba enggau main terjun jemah ila.
Taja pia, Abdul Karim madahka bepanggai ngagai Pandelela empu nentu tauka milih nama pemutus ke digaga laban iya ulih sereta udah ba renggat tinggi dalam bidang nya.
Abdul Karim madah pekara nya lebuh dipinta ngenang Pandelela enda mujur ngarika Malaysia ngagai lumba enggau main renggat Olimpik, tang ku iya dalam lumba enggau main endang bisi pun enggau pengujung sereta bisi timpuh teulihka penyulut, sereta suah ia timpuh nyulut urung empat ngagai lima taun.
“Pandelela udah ba renggat nya ambis kurang 15 taun enti enda salah, lebih ari nya. Berapa kali olimpik udah dipasuk iya. Aku chukup temegah ati ngagai penyulut iya, taja pan ke sekali tu enda mujur masuk Olimpik baka ti dikearapka iya empu.
“Tang kitai anang enda ingat iya kala ngangkatka nama Malaysia enggau nengeri kitai, sereta nengah iya kitai keterubah bulih midul perak enggau engkeraju dalam lumba enggau main terjun, lalu nya kebuah palan akuatik kitai diberi nama iya. Lalu iya udah ngereja enggau manah bagi iya.
“Nengah lumba enggau min tu mega iya udah ulih masuk nampung pelajar ba universiti, sereta iya agi dia (ba universiti) sekalika nadai agi nyadi atlit olimpek tang iya agi ulih bepekit renggat Asia, nya bepanggai ngagai iya tauka nyadi pembimbing atlit terjun jemah ila,” ku iya.
Abdul Karim dikerandau pekara nya pengudah baum Jawatankuasa Tertinggi SABERKAS ditu, kemari.
“Kitai meri awak ngagai iya empu nentuka, enti iya deka enggau kitai, iya tau sereta udah tentu kitai chukup gaga ati, Enti iya deka terus meri pemanah ngagai Malaysia, Malaysia mega udah tentu gaga, iya ulih semua nya laban iya udah ba tikas nya sereta bisi kelayakan.
“Kitai serah ngagai iya, tang
udah tentu kitai deka ke iya mai tauka nempa raban nembiak tauka atlit kitai manah dalam lumba enggau main terjun tu,” ku iya.
Bepelasarka ripot berita BERNAMA, ‘Ratu Terjun’ menua Datuk Pandelela Rinong enggau Nur Dhabitah Sabri enda ulih masuk Lumba enggau Main Olimpik Paris 2021 pengudah semina nembuka acara 10 meter (m) platform seirama ba penuduk ke-12 di Kejohanan Akuatik Dunia di Doha, Qatar.
Nambah nya, Pandelela ti mega kala bulih midul engkeraju ba Sukan Olimpik Rio 2016 mega enda mujur dalam acara 10m platform individu pengudah bulih penuduk ke -29 ti ngumpul 231.15 poin, ti lalu enda ulih ngagai separuh akhir.