Wan Junaidi optimis Sarawak deka terus mansang ari baruh pegai Abang Johari
Yang diPertua Negeri Tun Wan Junaidi Tuanku Jaafar optimis Sarawak deka terus lantang enggau mansang ari baruh pegai Premier Sarawak Datuk Patinggi Tan Sri Abang Johari Tun Openg.
Iya madahka pengeransing perintah nengeri ari baruh Gabungan Parti Sarawak (GPS) entara ti bepelasarka Strategi Pemansang Pengudah COVID-19 (PCDS) 2030 udah nentuka Sarawak ba jalai ti engkeman ungkup penumbuh ekonoi ti meruan lalu dirichahka enggau inovasyen sereta kreativiti.
“Aku endang muji Premier Sarawak Datuk Patinggi Tan Sri Abang Johari Tun Openg ti ngemeratka ngagai pengawa numbuhka ekonomi baru.
“PCDS 2030 tu mekuh ngagai energi gadung lalu ulih dikemaru ti meruan, inovasyen sereta teknologi enggau ekonomi digital. Semua tu mekuh ngagai nentuka juluk Sarawak deka ngulihka ekonomi bepenatai pemisi tinggi datai ba taun 2030,” ku iya dalam jaku lalau Taun Baru China 2024.
Wan Junaidi madahka tikas penyapai ti chukup besejarah ba taun 2023 iya nya Sarawak udah ngerikodka asil RM13.3 bilion ari baruh pegai Abang Johari.
Penyulut tu nentuka perintah nengeri ukai semina melanja program pemansang tang mega bekunsi pemisi tauka jereki enggau sistematik enggau rayat di selampur nengeri, ku iya.
Pia mega Sarawak ulih ngagihka bonus dua bulan ngagai pengereja pengawa perintah Sarawak kelimpah RM600 ungkup tetiap pengereja pengawa perintah besai ti meri servis di Sarawak, ku iya nambah.
“Pemeri tu nentuka pengawa ngatur nengeri ti endang bebasaka sukung sereta komitmen, tikas pengasi, penegapenggau pemisi ti enda bechiping ati ngagai pengereja pengawa perintah nengeri enggau mega perintah besai mantu perintah ngemujurka mayuh macham program, ke lalu nerenakka empas positif ngagai ekonomi menua tu,” ku iya nambah.
Wan Junaidi madahka ‘tikas penegap’ ekonomi Sarawak tebantai agi enggau penambah KDNK 4-5 peratus dalam taun 2023, ti nyapai RM146 bilion, dibandingka enggau penumbuh 6.5 peratus sepenyampau RM140.1bilion dalam taun 2022.
Penambah tu, ku iya mandangka tikas pengasi polisi sereta strategi perintah Sarawak dalam nyungkak pemansang ekonomi.
Ku iya madah, pia mega perintah nengeri endang ngemeratka pekara pelajar sereta pemerat guna Jaku English ti numbuhka sekeda Sekula Sekondari Inggeris Antarabansa.
Perintah nengeri mega, ku iya, ngelangkar nyendiaka pelajar tinggi ti enda bebayar datai ba taun 2026.
“Tu ngayanka sekeda agi chara ti ngembuan runding ke mua ngagai pemansang modal mensia. Enggau ngemeratka pelajar, perintah Sarawak ukai semina nentuka pemansang ti inklusif, tang nentuka tetiap individu disikap ngambika ulih meri sukung ngagai pemerat guna nengeri sereta rayat,” ku iya.
Pengawa ngenukuka Sijil Peperiksaan Bersekutu (UEC) ari perintah Sarawak dalam pengawa ngambi pengereja pengawa ungkup servis perintah nengeri mega mandangka pengawa nyadi ketuai di nengeri tu mega bebasaka ngagai pemisi ti mayuh enggau mungkur semua di nengeri tu, ku iya nambah.
Wan Junaidi madahka tu mega ngayanka perintah nengeri nemu bekaul enggau pemisi asil ekonomi, rama enggau politik pelajar China ngagai Sarawak sereta rayat.
“Di Sarawak, pengawa nerima pupu raban bansa enggau jalai pengarap endang udah asal. Tu mega nyadi penegap penyerakup ke ngaul komuniti begulai.
“Komitmen dalam bekunsi enggau ngasaika mayuh pengerami hari besai tu udah megai tanggungpengawa berat dalam ngadaka komuniti ti lantang, ngayanka penyerakup dalam mayuh pemisi ti nyadi penegap khas Sarawak.
“Aku pechaya kitai nyadi siti ruang bilik ke besai ti seruran nyaga pemerat, pengelantang pendiau enggau guna sama diri, mekuh ngagai runding ti bisi tanggungpengawa begulai ke endang udah bisi dalam renggat komuniti di nengeri tu,” ku iya.
Wan Junaidi dalam jaku lalau iya mega meri besai tabi basa ngagai (ke dulu) Yang di-Pertuan Agong Al-Sultan Abdullah Ri’ayatuddin Al-Mustafa Billah Shah Ibni Al-Marhum Sultan Haji Ahmad Shah Al-Musta’in Billah ti udah nyiri iya nyadi Yang di-Pertua Negeri Sarawak kelapan bedau lama ti udah.
“Aku mega deka meri tabi basa enggau pengaga ati ngagai Seri Paduka Baginda Yang Di-Pertuan Agong Sultan Ibrahim Ibni Almarhum Sultan Iskandar ti udah dichiri nyadi Yang Di-Pertuan Agong Malaysia ke-17 bedau lama ti udah.
“Aku endang beterima kasih ngagai Yang di-Pertua Nengeri ke dulu Tun Pehin Sri Abdul Taib Mahmud ke udah meri sukung ti besai dalam megai tanggungpengawa berat ba pemansang holistik Sarawak.
“Nyadi Apai Sarawak Moden ke endang dipebasa, aku meri tabi basa ngagai pengawa ti udah digaga iya nyereta Kabinet Sarawak dalam taun 1963 nyentukka iya enggau lantang ati magi baton ngagai Pehin Sri Adenan Satem dalam taun 2014,” ku iya.