Sarawak nyuluk deka nyapai tiga pekara besai dalam taun 2024
Ti ulih nempa rampa menua ti kondusif dikena ngemajuka nengeri tu
Sarawak di sebuah pulau sereta semina siti chara dikena mai orang tama kitu iya nya ngena penerebai bilun. Aku ngarapka kitai ulih netapka randau enggau autoriti perintah besai enda lama agi sereta nguasa kompeni penerebai bilun nya dalam taun tu.
KUCHING: Sarawak ngarapka ulih nyapai tiga pekara besai dalam taun 2024, ti ulih nempa rampa menua ti kondusif dikena ngemajuka nengeri tu.
Premier Sarawak, Datuk Patinggi Tan Sri Abang Johari Tun Openg madahka, keterubah, pengudah 43 taun ditumbuhka, perintah Sarawak deka ngambi pulai Penyangkai Kapal Bintulu ari perintah besai, ti ukai semina ketegal tu ari baruh kuasa Sarawak nitihka konstitusyen tang ketegal Sarawak patut ngelanggur semua pekara pemansang penyangkai kapal ti mungkur serata Sarawak nyengkaum kandang menua uli ti kaya sumber.
Kedua, ku iya, Sarawak ngembuan juluk deka bisi sebuah kompeni penerebai bilun (MASWings Sdn Bhd) ti ukai nyendiaka servis penyambung di menua pesisir aja tang nyengkaum terebai ke menua bukai di Asia tu, lalu dikearap ukai semina nempa kaul penerebai Sarawak enggau wilayah bukai tang mega mai temuai tama kitu sereta nyungkakka agi dagang enggau pengawa meranakka puku di nengeri tu.
“Sarawak di sebuah pulau sereta semina siti chara dikena mai orang tama kitu iya nya ngena penerebai bilun. Aku ngarapka kitai ulih netapka randau enggau autoriti perintah besai enda lama agi sereta nguasa
Datuk Patinggi Tan Sri Abang Johari Tun Openg
kompeni penerebai bilun nya dalam taun tu.
“Ketiga, kitai mega ngembuan juluk deka bisi pemerat ti besai dalam bank dagang kena nyendiaka Sarawak platform wang awakka ulih ngangkatka agi ekonomi nengah pemansang PKS enggau pengawa dagang.
“Sarawak udah bisi sekeda pemerat dalam bank nya, enggau kitai deka nambahka pemerat nya. Aku arap bendar kitai ulih netapka randau enggau lengkas awakka ulih ngambi bagi enggau aktif dalam pejalai bank enggau nyendiaka servis manah ngagai Sarawak,” ku iya.
Abang Johari ti mega Menteri Pekara Wang enggau Ekonomi Baru madahka pekara nya dalam penerang jaku pesan iya nyerumba Taun Baru China 2024.
“Nya tiga platform strategik ti patut dikembuan Sarawak
kena numbuhka siri ekosistem kena ngangkatka ekonomi Sarawak ngagai renggat nangkan nya,” ku iya.
Nambah nya, iya madahka pengering Sarawak iya nya pengaya sumber asal ti nyengkaum ai enggau panchar mata panas, sereta, Sarawak udah nguna urung 3.5 gigawat potensiall hidro enggau semua potensial ti bisi iya nya 20 gigawatt.
Iya madahka ke guna jemah ila, Sarawak deka ngubah chara ngeluarka kuasa hidro ngena energi ari ai ti anyut lalu ukai ngaga takung ai besai ti ulih ngebahka kandang endur ti besai.
Ku iya ti mega Menteri Kuasa enggau Pemeruan Rampa Menua madahka, Sarawak deka nguna ngena chara besai potensial energi solar kelebih agi ti ngena panel solar melepung ba tekad ai hidro di nengeri tu.
“Nya sumber ti ulih dikena baru ke mesti diserungkai kitai setipak enggau juluk ti ditetapka PBB ari baruh SDG tauka Matlamat Pembangunan Sosial, iya nya ukai semina kena ngangkatka ekonomi baka ti ditetap ngena penumbuh KDNK tang mega kena meri penguntung ngagai mensia mayuh,” ku iya.
Berebak enggau tu, iya sereta ngarika sida sebilik meri selamat ngintu Taun Baru China, ‘Gong Xi Fa Cai’ ngagai semua komuniti China di Tanah Kenyalang tu.
Taun 2024 ku iya, iya nya Taun Naga nitihka zodiak China ti bisi 12 iku jelu, sereta tiap iku ari 12 jelu nya ngelaika tiap taun dalam kalender lunar China.
“Aku amat ngarap ngambika semua bakih bansa China seruran besemangat dalam tama taun naga tu ti udah tentu nyimpan mayuh semaya enggau pengarap ngagai semua rayat Sarawak baka kitai ti bejalai begulai sama ngubah Tanah Kenyalang ti disayau tu nyadi nengeri maju nuju 2030,” ku iya.