Kandang menua tengah Sarawak begunaka sebuah sepital tungkul ati enggau lengkas: Wong

SIBU: Chairman Parti Sa’Ati Rayat Sarawak (SUPP) Pampang Dudong Wong Ching Yong ngarapka sebuah sepital tungkul ati ulih digaga khas dikena nangkup guna pesakit di kandang menua tengah Sarawak ditu.

Ku iya madah, enggau pemisi sepital tungkul ati ditu, ambis nadai pengawa berubat tumu ulih diberi ngagai pesakit.

“Tu iya nya juluk ati ti pemadu besai aku ungkup Taun Naga tu ngagai peranak di Sibu. Pemisi tu endang diansak. Nyema dipeda ari statistik, penyakit tungkul ati iya nya pemunuh ti pemadu tinggi bacha nya dalam Malaysia.

“Mayuh orang kena penyakit tungkul ati, kelebih agi tungkul ati ti enda manah, kena serang penyakit tungkul ati enggau ke bukai, ti nentuka pekara tu endang diansak patut bisi.

“Aku ngarapka bisi sepital jantung ulih digaga lalu dilangkar dalam berapa taun ti deka datai,” ku iya.

Iya madah munyi tu lebuh ti ditanya pengarang berita maya pengerami nerima pengabang SUPP Pampang Dudong di Jalai Lanang, ditu, kemari.

Beserimbai engau tu, iya minta dua kaban parlimen di Sibu iya nya Kaban Parlimen Lanang Alice Lau enggau Kaban Parlimen Sibu Oscar Ling megai tanggungpengawa sida dalam nentuka pemisi sepital tungkul ati ulih diagag enggau lengkas.

“Aku ngarap dua Yang Berhormat di Sibu iya nya Kaban Parlimen, deka megai tanggungpengawa sida lalu aku ngarapka iya nya (Sapit Premier Sarawak Datuk Amar) Dr Sim (Kui Hian), ti mega presiden SUPP, ulih mantu aku.

“Mantu semua peranak Sibu. Kami endang begunaka sebuah sepital tungkul ati enggau lengkas,” ku iya nyemetak.

Beserimbai enggau tu, pengerami nerima pengabang SUPP Pampang Dudong udah diatur enggau richah ti udah digulu beribu mensia mayuh pupu raban bansa enggau jalai pengarap.

Sama bisi datai iya nya ketuai ba kandang menua Sibu nyengkaum Penyanding Penemu SUPP Dudong Datuk Dr Soon Choon Teck enggau Ketuai Komuniti Bansa China Bagi Menua Sibu Temenggung Dato Vincent Lau Lee Ming.