Penyereta aktif nembiak dalam lumba, main ulih nyeliahka ngereja pengawa ti enda manahka pengerai
Penyereta raban nembiak ti aktif dalam aktiviti lumba enggau main ulih nyeliahka sida ari ti ngaul diri enggau pengawa ti enda manahka pengerai.
Sapit Menteri Pemansang Genturung Pendiau enggau Kandang Menua Datuk Rubiah Wang madah, sida ti ngelimpangka awak enggau pengawa ti manah baka lumba enggau main ulih mega ngenegapka pengelandik lalu pia mega ulih nempa modal mensia ti bisi kualiti.
“Lumba enggau maun iya nya pelasar ti pemadu engkeman dalam ngangkatka kualiti pemanah ulah nengah disiplin, sabar, ulih bebatak asur, enda muai jam, pengawa beraban, nyadi ketuai enggau mayuh agi.
“Berindik ari tu, kitai ngarapka raban nembiak ulih ngena memanah peluang enggau nyereta mayuh macham pengawa lumba enggau main ti udah tentu meri mayuh pemaik lalu dikena nyeliahka ari ti ngaul diri enggau penyalah rama ti enda manahka pengerai,” ku iya ti diambi ari ripot Unit Komunikasyen Perintah Sarawak.
Iya madah munyi tu lebuh ti bejaku dalam Pengerami Bejadi Pekit Main Badminton Kelab Badminton Muara Desa (MDBC) 2024 enggau Dewan Arena Datuk Rubiah Wang ba Dewan Taman Desa Ilmu di Kota Samarahan, kena Hari Minggu nyin tadi.
Beserimbai enggau tu, Rubiah madah, perintah besai maya aum ti udah bisi ngagihka sepenyampau RM50 juta dikena ngemanah enggau ngintu perengkaguna raban nembiak enggau lumba enggau main di selmapur menua kelebih agi prasarana ti udah repuk.
Kelimpah ari tu, ku iya, perintah ngagihka RM50 juta geran dikena meransang pengawa ngatur program lumba enggau main ti besai.
“Kededua agih belanja tu endang nyata ngayanka perintah besai siru enggau seruran ngemeratka kaul dalam pengawa lumba enggau main dalam komuniti.
“Pia mega perintah besai udah ngagihka belanja sepenyampau RM30 juta ungkup pemansang e-Sukan di menua tu ti setipak enggau juluk perintah deka nyadika Malaysia tu hab e-Sukan ke endang ditemu ba kandang menua tu,” ku iya ti mega Kaban Parlimen Kota Samarahan nya.
Dulu ari tu, pekit ti diatur Kelab Badminton Muara Desa (MDBC) enggau kerejasama Komiti Ngatur Dewan
Arena Rubiah Wang ti sama dibantu Perbadanan Sukan Sarawak (SSC) diatur kena 10 enggau 11 Februari 2024.
Dalam pekit tu udah ngayanka tim beraban Cassandra Hazel enggau Nurisha Fatihah nyadi champion ungkup kategori Beraban Orang Indu.
Lalu Ser Sudin enggau Entali Jingan udah nyadi champion ungkup kategori Beraban Lelaki Veteran Gempung Umur 85 Taun.
BeserimbaienggautuMuhd Amir Asyraaf Sepawi enggau Nikram Shazran udah nyadi champion ungkup kategori Beraban Novis Lelaki.
Sama bisi datai iya nya Sapit Residen Bagi Menua Samarahan Anuar Da’an, Pemesai Pelilih Menua Samarahan Ahmad Abdul Razak enggau Menijer Dewan Taman Desa Ilmu Borhan Silly.