KPM patut lengkas mutarka isu begunan SMK Sebuyau ti repuk, enda likun
KUCHING: Sekeda begunan di Sekula Sekondari (SMK) Sebuyau nyengkaum balai mayuh guna sekula tu dipeda mayuh ti repuk lalu enda likun dikena agi.
Menteri Utiliti enggau Telekomunikasyen Dato Sri Julaihi Narawi madah, berindik ari tu, Opis Menteri Pelajar (KPM) diansak ngelengkaska pengawa ngaga sekula ganti penuh SMK Sebuyau.
Taba ungkup sekula baru tu ku iya, udah bisi lalu udah dikemendarka ba kandang endur ngemesaika palan baru Sebuyau tang nadai dipeda bisi sebarang pemansang taja agih belanja KPM udah dikemendarka kenyau urung 10 taun ti udah.
Iya mega nyemetak madahka, dewan sekula tu ambika chunto enda ulih agi dikena nyadika endur makai ungkup nembiak buding nyentukka sida milih makai ba palan bukai.
“Kitai kasih meda bala nembiak buding ti diberi palan makai ba luar begunan enggau ngena kanopi sereta mija.
“Pia mega enggau palan endur nyendiaka pemakai sida berindik ari gaya dewan ke bisi tu enda ulih dikena agi,” ku iya madah nengah akaun Facebook rasmi.
Beserimbai enggau tu, Julaihi madahka agih belanja ari baruh Program Transformasyen Menua Pesisir (RTP) sepenyampau RM500,000 dikemendarka dalam ngaga dewan mayuh guna baru ke endang dirandaka SMK Sebuyau.
Iya ti mega Kaban Kunsil Nengeri (ADUN) Sebuyau tu madah, dewan baru tu deka digaga ba palan berimbai enggau padang futsal ditu.
Kelimpah ari dewan mayuh guna tu ku iya, bisi begunan bukai ti mega repuk tang agi dikena laban ke nadai pilih bukai kelimpah bisi ti endang enda ulih dikena.
“Meda gaya tu, aku ngarapka ulih diputarka enggau lengkas ari raban KPM,” ku iya madah.