JKKK patut nyadi ejen ti mai ubah, jematan rayat enggau perintah: Mong

SRI AMAN: Komiti Pemansang enggau Pengelikun Genturung Pendiau (JKKK) dipinta nyadi ejen ti mai ubah sereta mega ti ulih mai penerang ngagai perintah bekaul enggau isu ngintu pengelantang pendiau sereta penanggul rayat di kanang menua dipegai sida.

Kababn Kunsil Nengeri (ADUN) Bukit Begunan Datuk Mong Dagang madah, tetiap JKKK iya nya baka ‘jematan’ ti nyambung kaul rayat enggau perintah.

“Tetiap JKKK patut madahka penanggul ti ditapi rayat. Nyema JKKK enda meri kerejasama rat enggau perintah nya ti ngasuh mar ngagai perintah meri projek pemansang ngagai sebuah kandang menua,” ku iya.

Iya madah munyi tu lebuh ti bejaku ba Pengerami Ketuai Begulai Enggau Rayat ti diatur ba Rumah Suting, Punggu Dadak, Sri Aman ditu.

Ku Mong madah, pengawa numbuhka JKKK iya nya sebagi ari strategi dalam ngadaka komuniti ti ulih ngatika diri enggau proaktif dalam aktiviti pemansang.

“Organisasyen JKKK megai tanggungpengawa ti berat nyadi sebuah ‘injin’ ti ngatur pengawa pemun,” ku Mong.

“Nya alai endang beguna ngagai tetiap JKKK diberi latih sereta pengelandik dalam semua pekara numbuh, ngatur enggau ngemansangka ngagai nentuka JKKK ti bisi visyen, ulih ngatika diri, produktif lalu seruran mansang,” ku iya nyemetak.

Sama bisi ba pengerami tu iya nya Pemesai Unit Komunikasyen Perintah Sarawak (UKAS) DUN Bukit Begunan Jesi Bintoh, Penghulu Riji

Gu, Penghulu Menjang Niah sereta bala bukai.

Maya pengerami tu, Opis Betanam Betupi Sri Aman enggau Sarawak Energy Berhad (SEB) mega udah meri licha bekaul enggau tanggungpengawa ejensi sida empu.

Dalam pengerami tu, iya udah ngagihka dana ari baruh projek Program Transformasyen Menua Pesisir (RTP) sepenyampau RM150,000 ungkup tuju ngangkatmanah rumah panjai lalu RM10,000 ungkup JKKK rumah tu.