Tentuka produk perubat ti deka dijual bisi pemendar ari MDA
Kelebih agi ungkup pengemeran industri kereban perubat di menua tu ti deka bedagang nengah platform ‘online’
KUCHING: Pengemeran industri kereban perubat ti deka bedagang nengah platform online patut nentuka produk ti deka dijual bisi pemendar ari Autoriti Kereban Perubat (MDA).
Sapit Menteri Pengerai Malaysia, Dato Lukanisman Awang Sauni madahka, platform dagang baka Tiktok, Shopee, Lazada sereta ke bukai mega patut bejalaika tanggungpengawa sama nentuka produk tauka barang ti deka dijual pengemeran industri kereban perubat dikemendarka MDA.
Iya madahka diatu nyadi isu besai lalu suah ditanya iya nya bekaul enggau sekeda barang tauka kereban perubat ti dijual nengah platform online ditemu nadai dikemendarka MDA, sereta bisi bepenemu ngambika ‘posting’ nya dibatak ari paltform dagang.
“Aku ngasaika (matak ‘posting’) nya enda adil, enggu bisi mega sadang penemu ngambika akta kitai (ti bekaul enggau pekara nya) diubah mimit.
“Nya alai aku ngasaika, baka ti disaut aku, aku begunaka sukung kaban parlimen ngambika betanya sereta meri sadang penemu pekara tu dalam parlimen, awakka kitai ulih ngubah (akta nya).
“Ba bagi kitai, kitai deka mansik (semua) penemu nya laban pekara tu ukai ti keterubah ditanya, tang suah ditanya maya sesi ‘libat urus’ diatur,” ku iya ngenang entara sadang penemu ke dibantaika pengemeran industri kereban perubat maya baum pengarang berita kemari.
Dulu ari nya Lukanisman ngulu sesi ‘libat urus’ begulai enggau pengemeran industri kereban perubat di nengeri Sarawak, ti diatur Autoriti
Kereban Perubat (MDA) sereta disukung Opis Menteri Dagang Antarabansa, Industri enggau Pemeranak Puku (MINTRED) ba BCCK ditu, kemari.
Ditanya baru sekalika pekara ti sama dipejalaika ngagai pengemeran industri kereban perubat menua luar, Lukanisman madahka, enda ngira bagi kereban perubat ti enda direjista ari baruh MDA, endang enda ulih dilakuka, enda ulih diiklan.
Iya enda ngenggaika penerit undang-undang ti nagang kereban perubat ti enda direjista ari baruh MDA ari dijual ukai pekara ti senang.
“Nya kebuah kitai minta platform dagang ngambika sama bejalaika tanggungpengawa iya nya enda ngemendarka penyual ngelakuka kereban perubat ke nadai pemedar ari MDA. Aku ngasaika tu chara timpuh pandah ulih dipejalaika kitai.
“Dalam timpuh ti sama, tanggungpengawa KKM mega patut ngatur mayuh ari program penyedar ngagai mensia mayuh pasal produk ti dikemendarka MDA,” ku iya.
Dulu ari nya iya madahka, MDA sebengkah ejensi ti ditumbuh ngena Akta 734 sereta Akta 737 nyadi sebengkah badan ti kontrol atur bekaul enggau kereban perubat.
Nya alai tuju sesi libat urus diatur ngambika MDA ulih bekunsi sereta ngulihka penemu ari pengemeran industri kereban perubat ari nengeri Sarawak.
“Kelimpah ari nya tuju libat urus tu diatur, MDA bejalaika tanggungpengawa nyadi penyanding penemu sida pengemeran industri kena ngangkatka produk ti dieka dipromosyen.
“(Ba industri kereban perubat) Kitai ulih mansang, lalu MINTRED bisi solusyen enggau inisiatif bejalaika dagang , tu ke diguna kitai iya nya ni penyampat sida pengemeran industri kereban perubat bulih insentif.
“Kitai ukai semina fokus ngagai industri besai tang mega kitai deka nempa orang ti landik enggau pandai nyendiaka produk dijual ngagai makit dunya,” ku iya seraya mdahka nya mega tanggungpengawa MDA enggau KKM.
Sama bisi datai ba sesi libat urus nya kemari, Sapit Menteri MINTRED Datuk Dr. Malcom Mussen Lamoh enggau sida bukai.
“Ba bagi kitai, kitai deka mansik (semua) penemu nya laban pekara tu ukai ti keterubah ditanya, tang suah ” ditanya maya sesi ‘libat urus’ diatur.
Dato Lukanisman Awang Sauni Sapit Menteri Pengerai Malaysia