Pusat Kanser Sarawak deka berengkah digaga pengudah mekanisma pekara wang diputuska
KUCHING: Opis Menteri Pengerai Malaysia (KKM) deka berengkah ngaga Pusat Kanser Sarawak pengudah mekanisma pekara wang nya ulih diputuska.
Sapit Menteri iya, Dato Lukanisman Awang Sauni madahka, tambah mega proses ngaga sebuah fasiliti nyengkaum Pusat Kanser Sarawak begunaka timpuh.
Ku iya, pekara ti udah disetuju perintah Sarawak enggau Malaysia iya nya Premier Sarawak meri sadang penemu siti mekanisma pekara wang ngagai perintah besai ngambika palan nya di nengeri tu ulih digaga, sereta dalam bajet 2024, Menteri Besai besetuju enggau sadang penemu nya.
“Diatu kitai udah numbuhka siti komiti entara KKM, Menteri Pekara Wang enggau perintah nengeri, sereta proses nya benung bejalai.
“Kereja tumu, pelin tauka turai tukuh semua nya diputuska pengudah mekanisma pekara wang ulih diputuska.
“Tuukaipekaratimuntang, laban enda kala nyadi iya nya perintah nengeri nyendiaka semua pakej wang dikena ngaga fasiliti,” ku iya lebuh dipinta raban pengarang berita nerangka kemaya Pusat Kanser Sarawak ulih berengkah digaga.
Dulu ari nya Lukanisman ngulu sesi ‘libat urus’ begulai enggau pengemeran industri kereban perubat di nengeri Sarawak, ti diatur Autoriti Kereban Perubat (MDA) sereta disukung Opis Menteri Dagang Antarabansa, Industri enggau Pemeranak Puku (MINTRED) ba BCCK ditu, kemari.
Bejaku baru, iya madahka, perintah Sarawak minta KKM kelimpah ari ti ngaga, mega patut bejalaika tanggungpengawa tauka operasyen palan nya.
Iya madahka taja pan siti komiti MA63 bekaul enggau autonomi pengerai, tang servis pengerai agi ari baruh kuasa perintah besai sereta pekara ti ditetapka dalam perlembagaan nya mega patut dititih.
“(Pengawa ngaga) Pusat Kanser Sarawak siti proses ti panjai, tang kitai endang ngaga, lalu (enti tembu ila) tu mega deka nyadi siti ikon ngagai sistem pengerai Sarawak.
“Apin bisi taga timpuh tang kitai (ngaga) berenggat-renggat, (engka) dalam timpuh lima taun tauka lebih ari nya.
“Kitai patut ngaga pemutus bekaul enggau mekanisma pekara wang dulu. Semua sadang penemu bakani gaya palan nya, nama servis ti disediaka, berapa buah katih udah diputuska. Semina bakani duit ke diberi Sarawak ngagai perintah besai, enggau bakani perintah besai ngepunka projek,” ku iya.
Bekaul enggau Pusat Kanser Sarawak, dalam pun bulan Januari apin lama, Menteri Pengerai Malaysia, Datuk Seri Dr. Dzulkefly Ahmad lebuh ti meri penemuai basai ngagai Premier Sarawak Datuk Patinggi Tan Sri Abang Johari Tun Openg, Dr. Dzulkefly madahka, perintah Sarawak mega minta pengawa ngaga Pusat Kanser Sarawak dipejalaika enggau lengkas.
Dr. Dzulkefly mega bepenemu palan nya patut digaga enggau lengkas laban chukup diguna ba nengeri tu, sereta iya besemaya mai pekara nya ngagai Menteri Besai Datuk Seri Anwar Ibrahim.