PERANTIS nyukung palan belajar Jaku Iban ditumbuh di universiti nengeri tu
Persatuan Intelektual Pribumi Sarawak (PERANTIS) nyukung sadang penemu Sapit Premier Sarawak ti minta palan belajar Jaku Iban ditumbuh tauka dipindah ngagai universiti di nengeri.
Sebedau tu, Sapit Premier Sarawak Datuk Amar Douglas Uggah Embas kala meri sadang penemu nya dikena mutarka isu suntuk pengelicha Jaku Iban di Universiti Pendidikan Sultan Idris (UPSI).
Penerang begulai Mandal Presiden PERANTIS Nelly Tawai enggau Ketuai Raban Indu PERANTIS Robbia Jarup meri puji ngagai Uggah ti balat ibuh tauka bebendar deka mutarka suntuk pengajar Jaku Iban ti lama udah nyadi sereta apin teputar.
“Jaku Iban diatu ukai semina nyadi jaku etnik ti dikena komuniti Iban bejaku tauka berandau tang udah ngerembai sereta ulih dipelajarka semua orang. Jaku Iban mega
ukai semina ‘mother tongue’ tauka ‘jaku tangkai mengandai’ tang undah nyadi siti budaya enggau dikena nentuka jaku tu terus dijaga.
“Sadang penemu ti dibantaika Sapit Premier Sarawak Datuk Amar Douglas Uggah Embas (bekaul enggau Jaku Iban nya) chukup manah.
“Sadang penemu perintah Sarawak pasal kus Jaku Iban ti dipejalaika ba enda ngira institusyen pelajar tinggi (IPT) mega amat betul. Mayuh pengajar
Jaku Iban ti ulih minta nyadi pengelicha tang palan nya jauh (di Semenanjung) sereta jauh ari diri sebilik, ti ngujungka nulak ari dianjung gawa din (UPSI),” ku seduai iya.
Nambah nya, Nelly enggau Robbia madahka, chara nya mega ngemuntangka nembiak menua tu belajarka jaku nya enggau senang sereta ulih ngangkatka standard Jaku Iban nya empu.
PERANTIS, ku seduai iya, mega ngarapka pengawa nyendiaka kus Jaku Iban ba institusyen pelajar tinggi ulih dipajakka tiap taun dikena napi peminta guna pengajar Jaku Iban ti seruran enda chukup ba sekula.
“Mayuh raban graduet bisi niat tauka bisi pengerindu milih profesyen pengajar dalam kus Jaku Iban tang enda kena pilih ba bidang nya. Bisi mega ngasaika UPSI nya kelalu jauh ti ngujungka nulak peluang nya,” ku seduai iya.
Ba sebengkah penerang berita sebedau tu, Sapit Premier Sarawak nya kala mada deka berandau enggau UNIMAS bekaul enggau sadang penemu nya sereta ngambika ulih disetuju.
Ba pengerami bejadi Diksionari Salin English - Iban ti diatur ba Institut Pendidik Guru (IPG) Kampus Batu Lintang apin lama, Uggah mega madahka deka berandau enggau Opis Menteri Pelajar Malaysia ngambika palan belajar Jaku Iban nya ulih dipindah ke nengeri tu.