Projek ngemanah Medan Niaga Satok ulih matak penatai temuai
KUCHING: Penembu pengawa ngemanahka agi Medan Niaga Satok kelebih agi ba kandang endur benteng dipelaba ulih nyadi pematak temuai nyengkaum temuai ari nengeri bukai di Semanjung Malaysia ngagai endur nya.
Direktor, Opis Dagang Betanam
Betupi Perintah Besai (FAMA) Nengeri Sarawak, Ramli Mat Sani madahka, keretas perambu enggau ngaga projek benteng nya dipejalaika FAMA nitihka langkar ti dipesetuju Premier Sarawak Datuk Patinggi Tan Sri Abang Johari Tun Openg.
Iya madahka proses tinda udah dipejalaika sereta udah diberi ngagai kunteriktor ti bulih tinda ngaga projek nya.
“Tinda (projek ngaga benteng Medan Niaga Satok) udah dibuka enggau udah ditutup, sereta udah diberi ngagai kunteriktor. Projek tu dipelaba ulih digaga dalam timpuh 72 minggu, iya nya urung setaun lebih.
“Kebendar ia duit kena ngaga projek tu ari perintah nengeri, Premier Sarawak ngungkupka urung RM7 juta, tang tu nyengkaum dikena ngaga palan ngengkahka kerita beringkat dibelakang (Opis FAMA Nengeri Sarawak) kelimpah ari benteng.
“Kitai ngarapka penembu benteng nya ila ulih matak mayuh agi orang datai kelebih agi ari Kuching tu empu sereta ari serata Sarawak, enggau raban temuai ari nengeri bukai di Semenanjung,” ku iya.
Ramli ditanya bekaul enggau pemansang pemadu baru pengawa ngemanahka agi benteng Medan Niaga Satok maya baum pengarang berita program FAMA Fest 2024 @Sarawak ke diatur di Opis FAMA Nengeri Sarawak ditu, kemari.
Kelimpah ari nya, ditanya bekaul enggau Bazar Ramadan Medan Niaga Satok 2024 ti diatur FAMA, iya madahka, bisi 72 lot disediaka ngagai orang dagang ti deka bejual semanjai bulan Ramadan.
“Bazar Ramadan FAMA bisi spesil agi ari kebukai, iya nya kami ngemeratka penyeragaman baka disediaka selap mija enggau apron sereta nyaga pemeresi. Ba bazar tu ila kami bisi nyendiaka kaunter pengerai kena nentuka pemakai ke dijual nya selamat diempa tauka manahka pengerai,” ku iya.