Loji ammonia, grafit deka meri empas besai ngagai Sarawak
Nyendiaka beratus peluang gawa ti landik enggau pandai ti bepenatai pemisi tinggi dalam bidang injinir nyengkaum eksekutif ”
BINTULU: Pengawa ngaga loji ammonia enggau loji grafit ditu dipelaba berengkah taun tu deka mai empas besai dalam pemansang ekonomi Sarawak, ku Premier Sarawak Datuk Patinggi Tan Sri Abang Johari Tun Openg.
Nitih ku iya, loji ammonia ti beungkus AS$3 bilion (RM14.34 bilion) semak enggau loji metanol di Tanjung Kidurong deka nyendiaka beratus peluang raban pengereja pengawa ti landik enggau pandai bepenatai pemisi tinggi dalam bidang injinir nyengkaum eksekutif ti bejalaika operasyen nya.
Ku iya, loji grafit benilai AS$1.5 bilion (RM6.3 bilion) deka digaga di Bintulu iya nya di Taman Perindustrian Samalaju, ti lalu nyadi loji keterubah baka nya di Asia Tenggara.
Iya madahka, grafit iya nya perengka dikena dalam injin jet ti diidupka ngena hidrogen, lalu tu ngayanka ubah ari ‘bahan bakar fosil’.
“Kitai deka nyadi pengeluar keterubah grafit di Asia Tenggara enggai Bintulu,” ku iya lebuh bejaku ba pengerami nerima pengabang Taun Baru China 2024 Parti Rakyat Bersatu Sarawak (SUPP) Pampang Bintulu di Restoran Dinner World, Bintulu Sentral ditu, kemari.
Abang Johari madahka, nyadi sebuah nengeri ti dulu ke mua dalam pemansang ekonomi baru bepelasarka ekonomo gadung global, pengeran perintah Sarawak diaku perintah besai, nyengkaum Menteri Besai Datuk Seri Anwar Ibrahim.
Ku iya mega, 19 duta Kesatuan Eropah (EU) sereta bala ketuai korporat negara EU nyengkaum ari Finland, Jerman, Sweden enggau ke bukai datai ke nengeri tu belajarka polisi ekonomi Sarawak.
“Tu reti iya dunya nemu Sarawak bejalaika chara
ekonomi baru enggau Bintulu mega nerima empas ia,” ku iya.
Ngenang pasal politk, Abang Johari madahka SUPP udah sama bebendar enggau mai penegap politik nengeri tu nyentuk perintah Gabungan Parti Sarawak (GPS) ulih mekuh ngemansangka
Sarawak.
Nitih ku iya, enggau penatai pemisi nengeri ti majak nambah enggau pengeran nempa pengereja pengawa begaji tinggi, perintah GPS deka ngangkatka tikas pelajar anak Sarawak ngambika relevan enggau makit kereja ti disediaka.
“GPS deka meri pelajar ti setipak enggau pemansang ekonomi nengeri tu nengah pengawa nyendiaka pelajar pechuma ngagai anak Sarawak ti belajar ba universiti ke dikeempu Sarawak ba taun 2026.
“Tu ukai semaya pengawa bepilih, tang aku ngereja nya enggau nadai seberang semaya laba perintah bisi pengibuh enggau nengeri tu diaku nyadi nengeri bepenatai pemisi tinggi bepelasarka penatai pemisi ti nambah ari RM11 bilion ba taun 2022 ngagai (lebih) RM13 bilion (taun 2023).
“Tu ukai mudah, tang kitai bisi chara ari sukut ngatur dalam ngasilka penatai pemisi ti manah,” ku iya.
Taja pia, Abang Johari madahka perintah nemu ngelimat, sereta penatai pemisi urung RM400 ngagai RM600 juta mega disimpan sereta semina deka dikena melanja pekara ti beguna iya nya nyadi tabung nengeri tu jemah ila.
“(Reti ia) Ungkup bala anak, beri sida pelajar ti manah enggau teknologi ti manah awakka sida ulih terus maju dalam ngemansangka Sarawak jemah ila,” ku iya seraya ngarapka Taun Naga 2024 deka mai tuah belimpah ngagai Sarawak.
Sama bisi datai , Sapit Premier Sarawak ti mega Presiden SUPP Datuk Amar Dr Sim Kui Hian enggau bini iyia Datin Sri Enn Ong Siok Ean, Menteri Industri Pemakai, Komoditi dan Pemansang Wilayah Sarawak Dato Sri Dr Stephen Rundi Utom, Menteri Pengangkut Sarawak Dato Sri Lee Kim Shin, Sapit Menteri ba Opis Premier Sarawak (UndangUndang, MA63 enggau Kaul Sarawak - Perintah Besai) Datuk Sharifah Hasidah Sayeed Aman Ghazali, ADUN Tanjong Batu ti mega Chairman Pampang SUPP Bintulu Johnny Pang enggau bini iya, Sapit Chairman BDA Dato Haidar Khan Asghar Khan enggau Residen Bahagian Bintulu Nyurak Keti.
“Kitai deka nyadi pengeluar keterubah grafit di Asia Tenggara enggau Bintulu.