FAMA Fest 2024 @Sarawak deka diatur berengkah 1-4 Mac di Miri
Opis Dagang Betanam Betupi Perintah Besai (FAMA) naga urung sepenyampau RM500,000 asil ari pengawa bejual nengah program FAMA Fest 2024 @Sarawak ti deka diatur ari pukul 10 pagi ngagai 10 malam, berengkah ari 1 nyentuk 4 Mac di Miri.
Direktor FAMA Nengeri Sarawak, Ramli Mat Sani madahka, objektif program nya kena mantai sereta ngelakuka produk betanam betupi enggau pemakai ti dikeluarka orang dagang menua tu empu ngagai komuniti kelebih agi di bagi menua Miri enggau peranak menua Brunei Darussalam, sereta ari Sabah.
Iya mega madahka program nya ti diatur ba Bintang Megamall, Miri nya mega tuju iya dikena ngerembaika agi makit produk ari industri asas tani enggau produk segar menua tu ngagai makit dalam enggau luar menua, kelimpah ari ngelakuka produk orang dagang nengah platform Portal Agrobazaar Online.
“Kami (FAMA) naga urung 25,000 iku orang ti nyengkaum ke diau di Miri, ngelinggi Miri sereta ke datai ari menua Brunei Darussalam enggau Sabah datai ngagai program tu ila, sereta ditaga asil ari pengawa bejual ke dipejalaika orang dagang dalam timpuh empat hari tu urung sepenyampau RM500,000.
“Nyerumba program tu ila bisi ngatur program ‘business matching’ ungkup orang dagang begulai enggau ejensi tauka pengimport ari menua luar iya nya Hong Kong, Brunei Darussalam, Thailand, Kemboja, China enggau dagang menua tu. Orang dagang ti bisi ati deka ngelakuka produk sida ke menua luar tau datai kena 4 Mac ba Bilik Baum Orkid Meritz Hotel.
“Nengah program baka tu, FAMA mega naga sepenyampau 15 metrik tan utai jual ti agi baru ti nyengkaum mayuh bansa buah enggau sayur sepemanjai program tu diatur,” ku iya maya baum pengarang berita bekaul enggau FAMA Fest 2024 @Sarawak ti diatur ba Indu Opis FAMA Nengeri Sarawak ditu, kemari.
FAMA Fest 2024 @ Sarawak dipelaba deka dipenyadika Sapit Ketuai Sekretari (Pemansang) Opis Menteri Betanam Betupi enggau Keterjaminan Makanan, Datuk Badrul Hisham Mohd, sereta mega dijangka digulu Ketuai Direktor FAMA, Abdul Rashid Bahri enggau pengari ari Opis Menteri Industri Pemakai, Komoditi enggau Pemansang Wilayah Sarawak.
Nengah FAMA Fest 2024 @Sarawak iya nya program edisi ke-3 FAMA, bisi 34 orang dagang ti nyengkaum ari Sarawak enggau Semenanjung Malaysia, lalu sida ke dikanggau enggau program tu, iya nya ari kategori tiga ngagai lima (Nilai Jualan RM100,000 ngagai RM15 juta) orang dagang ti udah sedia napi peminta makit dalam enggau luar menua.
Dalam program tu, FAMA bisi mantaika 200 stock keeping unit (SKU) produk ti manah deka dipandang sereta dijual orang dagang.
Kelimpah nya, Jualan Agro MADANI iya nya program ke benung dipejalaika FAMA kena ngurangka rega ba renggat runchit enggau makit mega bisi diatur maya program FAMA Fest 2024 @ Sarawak. Nengah Jualan Agro MADANI nyaFAMA deka nyendiaka KOMBO MADANI ngena rega ti khas.
Sama bisi ba aum pengarang berita nya, Sapit Direktor FAMA Nengeri Sarawak (Pemansang) Adeyong Tomick enggau Sapit Direktor FAMA NEngeri Sarawak (Operasyen) Greyston Peli.