Kualiti, imej lada Sarawak mesti dijaga
Anang ngemendarka pengawa nyampur komoditi nya enggau ti asal ari menua pengeluar bukai Pengawa nyampurka (komoditi) nya ulih ngenyaika pemanah nama kitai enggau peminta ari luar menua.
KUCHING: Kualiti enggau imej lada Sarawak mesti dijaga manah laban pemanah nama tauka reputasyen ia nyadi eksport bekualiti tinggi, ku Sapit Premier Sarawak Datuk Amar Douglas Uggah Embas.
Nitihka iya, pedagang ti nadai tanggungpengawa anang ngemendar nyampurka komoditi nya enggau ti asal ari menua pengeluar bukai kena nambahka penyampau eksport sida.
“Pengawa nyampurka (komoditi) nya ulih ngenyaika pemanah nama kitai enggau peminta ari luar menua,” ku iya ti mega Menteri Pekara Wang enggau Ekonomi Baru Kedua.
Iya madahka pekara nya maya nerima penemuai basa ari Opis Lada Malaysia (MPB) enggau Syarikat SaraSpice Sdn Bhd ba opis iya ditu, kemari.
MPB diketuaika Chairman iya Dato Anyi Ngau enggau Ketuai Direktor iya Vincent Sawat, sereta SaraSpice diarika Chairman iya Datuk Seri Doris Sophia Brodie.
Uggah bejaku baru madahka, Sarawak mayuh
“
pengkalan kediri nya alai lada ari luar Sarawak ulih dibai tama.
“Nya kebuah, pengawa neritka undang-undang enggau betul amat beguna.
“Kitai mesti nentuka eksport lada kitai semina lada Sarawak chulen ti lebih manah enggau bekualiti ari menua bukai,” ku iya.
Uggah mega minta MPB ngiga chara dikena nambahka asil tauka produksyen nengeri enggau matak lebih mayuh raban nembiak ngambi bagi dalam pengawa betanam lada.
”
“Dalam pekara tu mega, aku ngarapka lembaga pengarah ulih mantaika chara bakani pekebun kitai ulih nambahka asil tauka produksyen lada burak bekrim enda ngena rachun,” ku iya.
Kelimpah ari nya, Uggah mega minta lembaga pengarah madah ngagai pengari rayat ni maya deka ngagihka subsidi ba sitak ke diarika (pengari rayat) laban bisi nyadi insiden, iya nya ukai pekebun lada diberi subsidi.
Maya meri penerang, Vincent madahka, bisi 31,841 pekebun mit ngereja urung 5,850 hektar kebun lada di bagi menua Betong, Sarikei, Sibu enggau bagi menua bukai sereta bisi sepenyampau RM15,562,659 bantu udah diberi ngagai pekebun nya.
Iya madahka, opis lada diatu benung nguji program nanam ngena chara organik.
“Kami benung nguji aplikasyen IoT .
“Tu nyengkaum nanam ngena chara fertigasyen ti nyadi program pemungkal ti enggau tuju enggau pengeran kitai deka matak raban biak nyadi pekebun enggau nambahka asil tauka produksyen sida,” ku iya.