Bengkel dokumentasyen jaku, adat etnik Kejaman kena 17-19 Februari

BELAGA: Mensia mayuh dilaluka sama enggau masuk Bengkel Projek Pendokumentasian Bahasa dan Adat Istiadat Etnik Kejaman (Fasa 1) ti diatur berengkah ari 17 ngagai 19 Februari tu di Sekolah Kebangsaan (SK) Abun Matu, Belaga sereta Rumah Panjai Kejaman Neh Long Liten, Belaga.

Bengkel tauka kereja jurai ti diatur Gerempung Bansa Kejaman Sarawak (PBKS) begulai enggau Dewan Bahasa dan Pustaka (DBP) Pampang Sarawak deka diatur dalam tiga fasa nya, tuju iya kena nyelak bup enggau diksionari jaku Kejaman ti komprehensif.

Entara panel ti dikanggau nyengkaum pemelajar baka Dr Amee Joan ari UNIMAS, sereta pengari ari DBP baka Roslin Majidi, Coretta, Edith Sulie enggau Shirley Amelia.

Pengerami nangguh bengkel nya kena 19 Februari 2024 deka dipenyadi Penghulu Jackson Kubang.

Raban ti ditaga masuk bengkel nyengkaum semua individu ti bisi pengerindu dalam jaku sereta adat enggau main asal etnik Kejaman.

Projek tu tuju ia dikena ngumpul entri jaku Kejaman sereta kesusasteraan etnik Kejaman baka cherita rayat, ngambika dichelak nyadi bup enggau diksionari.

Berindik ari nya, projek nya dikearap nyadi penyanding ti komprehensif pasal runding, budaya enggau pesaka asal mayuh bansa di Sarawak.

Skop projek mayuh aspek, nyengkaum sejarah, jaku enggau surat, budaya, seni, tukang enggau kraf jari, sebi bina sereta ekonomi etnik Kejamana di kandang menua Belaga.

Tu nyengkaum aspek baka penatai asal, jaku, adat, muzik asal, seni bina rumah panjai sereta kebukai ti ulih ngangkatka mayuh budaya di Sarawak.

Projek nya ngemeratka pengawa ngetan enggau nyaga pesaka asal budaya enggau jaku etnik Kejaman sereta kena ngaku pemayuh budaya di Sarawak.

Dikearapka projek tu meri pemanah besai dalam pemereti ngagai budaya etnik Kejaman enggau ngemayuhka agi landskap semua adat enggau main asal Sarawak.