UNIMAS bisi langgur nyendiaka program Ijazah Sarjana Muda Pendidikan dalam Jaku Iban: Ahmad
KUCHING: Universiti Malaysia Sarawak (UNIMAS) diatu ngelanggur nyendiaka program Ijazah Sarjana Muda Pendidikan dalam Jaku Iban.
Sapit Chanselor universiti nya, Profesor Dr Ahmad Hata Rasit madahka pekara nya maya meri penemuai basa ngagai Sapit Premier Sarawak Datuk Amar Douglas Uggah Embas ba opis iya ditu, kemari.
Uggah ti mega Menteri Infrastruktur enggau Pemansang Penyangkai Kapal mega siku Pro Chanselor universiti nya.
Nitihka Ahmad, program ti disediaka di Fakulti Pelajar, Jaku enggau Komunikasyen nya dikena mutarka penanggul suntuk pengajar Jaku Iban di nengeri tu.
“Kami ngarapka program tu ulih dipunka ba Semester 1, 2025/2026.
“Kelimpah ari nya, fakulti tu mega ngelanggur numbuhka Jabatan Bahasa-Bahasa Borneo ti nyengkaum Jaku Iban, Bidayuh, Melanau enggau dialek Melayu Sarawak,” ku iya.
Iya madahka, UNIMAS mega deka nambahka siti agi program Jaku Iban iya nya Jaku Iban ungkup Profesyen Komunikasyen nyadi kus elektif.
Kus nya deka disediaka ngagai semua nembiak ba semester keterubah 2024/2025.
Uggah apin lama ngelanggur ngambika UNIMAS nyendiaka program Jaku Iban.
Sama bisi ba penemuai nya Chairman Lembaga Pengarah UNIMAS Tan Sri Datuk Panglima Sulong Matjeraie, Sapit Mandal Chanselor (Pekara Pelajar enggau Alumni) Profesor Dr Al-Khalid Othman, Dekan Fakulti Pelajar, Jaku enggau Komunikasyen Profesor Dr Ambigapathy Pandan, Pengelicha Jaku Iban; Pelajar Fakulti, Jaku enggau Komunikasyen Dr Remmy Gedat enggau Pengelicha, Pelajar Fakulti, Jaku enggau Komunikasyen Dr Santrol Abdullah.