Ungkup belanja besai diguna kena nganti paip lama Loji Penapis Ai Berawan-Tedungan
LIMBANG: LAKU Management Sdn Bhd (LAKU) begunaka ungkup belanja ari perintah nengeri kena nganti arus paip lama sepemanjai Loji Penapis Ai Berawan nyentuk ngagai Tedungan.
Chairman Lembaga Pengarah LAKU Datuk Nelson Balang Rining madahka, arus paip ti udah bisi nya udah lama, jai enggau mudah pantis ngujungka enda ulih nangkup kapasiti ai beresi ti disediaka.
Terang iya, ungkup belanja nya deka dipinta nengah bala pemesai di Limbang ngambi ulih dikenataika ngagai perintah nengeri awakka bisi dikena masang arus paip baru.
“Paip ke endang udah bisi nya udal lama enggau pantis, nya kebuah kami begunaka ungkup belanja ari perintah besai enggau nengeri laban kereja nukar arus paip baru begunaka ungkus ti tinggi,” ku iya bejaku ngagai raban pengarang berita pengudah Program Nyuaka Bantu Ai Irup ari LAKU Management Sdn Bhd Pejabat Kawasan Limbang di Masjid Kampung Telahak ditu, kemari.
Sama bisi datai Ketuai Genturung Pendiau Telahak Sahdan Mohidin.
Bejaku baru Nelson madahka, LAKU begulai enggau Opis Nyendiaka Ai Menua
Pesisir (JBALB) enggau konsisten nyendiaka servis lori tangki ai enggau ai irup dalam butul nyadi sebagi ari tanggungpengawa rama korporat (CSR).
Nitihka iya, sepenyampau 56,000 liter ai ditapis enggau 466 kutak ai irup dalam butul udah dianjung ngagai peranak ba kandang endur ti tekeruga.
Terang iya, lori tangki ai mega udah dianjung ngagai genturung pendiau ti tekeruga enggau palan ngambi ai sementara udah ditembuka ba kandang menua Rumah Kedai Tedungan ungkup peranak ti begunaka ai enggau lengkas.
Iya mega madahka pengawa ngaduka arus paip pantis ba sekeda kandang endur ke ditemu udah dipejalaika.
Dalam timpuh ti sama ku iya, pengawa mulaika pemanah nyendia enggau peneras ai ba kandang endur ti tekeruga benung chakah dipejalaika.
Genturung pediau ti tekeruga, iya nya Tedungan, Kampung Mengatai, Ulak, Belading, Anak Bukit, Kuala Awang, Binjai, Ipai, Merasam Bumbun, Meritam, Lubok Sigantang/Aur, Telahak enggau Kampung Lubok Piasau.