OSEIC digaga di Miri nyendiaka akses diagnosis tumu, intervensyen

KUCHING: Sebuah agi Pusat Sehenti Intervensi Awal (OSEIC) deka digaga di Miri ngambika ulih nyendiaka mayuh agi peluang ngagai nembiak mit timpang pendiau bulih akses diagnosis tumu enggau intervensyen ti patut.

Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah madahka, palan nya dikena nambah ke endang udah bisi iya nya di Matang (Kuching) enggau Dalat (Mukah).

Bepelasarka data penyampau nembiak mit bisi penanggul belajar beumur enam taun enggau baruh ari nya di Sarawak naka 31 Disember 2023, Miri ngayanka penyampau dua pemadu tinggi nembiak mit bisi penanggul belajar berejista di Sarawak, tang nadai fasiliti ‘one-stop’ disediaka ba kandang menua nya.

“Berindik ari pekara nya, perintah Sarawak ngungkupka RM2,028,000 dikena numbuhka OSEIC Miri ti dipelaba beoperasyen bulan Oktober 2024,” ku iya ba pengerami Graduasi OSEIC 2023 ditu, kemari.

Fatimah madahka, OSEIC keterubah dipenyadi kena 30 Oktober 2023 di Metro City, Matang di Kuching ti bisi 47 iku nembiak mit berejista sereta penyampau nya nambah ngagai 495 iku nembiak mit naka 31 Januari 2024.

Nitihka iya, ba taun 2022, bisi 26 iku nembiak mit pas ari OSEIC Matang enggau seraban agi 47 nembiak mit tembu belajar ba taun 2023.

Iya madahka, servis OSEIC Sarawak di kandang menua pesisir berengkah di Dalat kenyau 1 Mac 2023 ti nyendiaka servis diagnosis tumu, intervensyen enggau penyuman ungkup nembiak mit timpang pendiau di bagi menua Mukah.

Ku iya, naka 25 Januari 2024, bisi 33 iku nembiak mit udah ngerejista di OSEIC Dalat.

“Kitai deka terus ngerembaika OSEIC Sarawak ke bagian bukai nyengkaum kandang menua pesisir ti beguna kena nyendiaka mayuh peluang ngagai nembiak mit timpang pendiau bulih akses diagnosis tumu, program intervensyen ti meri empas manah enggau sesi terapi di serata Sarawak.

“Tu mega setipak enggau inisiatif perintah Sarawak nuju ngagai holistik enggau nentuka nadai siku kena tinggal,” ku iya.

Ngenang graduan OSEIC, Fatimah madahka kemari bisi 91 iku nembiak OSEIC udah pas ti nyengkaum 68 iku lelaki enggau 23 iku indu.

Lalu sida nya nyengkaum nembiak ari dua buah OSEIC ti benung beoperasyen iya nya OSEIC Kuching (82 orang) enggau OSEIC Dalat (sembilan iku).

Ku iya, bisi 27 iku nembiak mit nya nampung pelajar ba sekula arus perdana.

GAGA: Fatimah (tengah) begulai enggau nembiak mit graduet OSEIC, apai indai sereta temuai bukai begambar bebala mayuh kepengingat nyerumba pengerami Graduan OSEIC 2023 di Kuching, kemari.

BANTU: Nelson (dimua, kiba) nyuaka bantu ai irup dalam butul ngagai Sahdan ba Program Nyuaka Bantu Ai Irup ari LAKU Management Sdn Bhd di Masjid Kampung Telahak, Limbang ditu, kemari.