Ejensi dipegai KPWK udah nyikap diri betapi penusah bah
Ejensi ti bekaul ke dipegai Opis Menteri Pemansang Indu, Nembiak Mit enggau Pengelantang Komuniti (KPWK) begulai enggau Komiti Mutarka Penusah Ngenyit Nengeri Sarawak (JPBNS) diatu udah nyikap diri betapi enggau sebarang pekara ti nyadi ketegal bah.
Menteri iya, Dato Sri Fatimah Abdullah madahka, aksyen proatif udah dikemeratka baka ti dipejalaika opis menteri enggau ejensi ti bekaul maya betapi penusah ngenyit.
“Taun nyin kemari, ti melabaka musin landas deka nyadi nyentuk 2024, kitai udah nyikap diri dalam semua pekara enggau kerejasama JPBNS sereta ejensi ti bekaul.
“Nya nyengkaum ngelala bagi alai palan pengenduh maya bah, alai nyimpan kereban sereta nyendia barang enggau atur nyendiaka pemakai.
“Enti bah nyadi, enggau lengkas palan pengenduh diaktif alai ruang bilik ti kena keruga nya ngenduh,” ku iya lebuh dikerandau raban pengarang berita pengudah pengerami Anugerah Perkhidmatan Cemerlang (APC) opis menteri iya, ditu malam Hari Lima.
Fatimah mega ngelalau peranak kelebih agi ba kandang endur ti bah ngambika seruran ngadang enggau nyikap diri.
“Sedia sereta simpan semua dokumen enggau barang ti beguna nyema diasuh pindah.
“Amat beguna ngemeratka pengelikun semua individu, nyengkaum sida ti timpang pendiau, maya penusah ngenyit nyadi,” ku iya.
Nyaut bekaul enggau pampas pengerugi ketegal bah, Fatimah nerangka, taja pan opis menteri iya enda meri pampas duit, tang bantu ti disediaka ngagai individu tekeruga ketegal penasah nya kelebih agi ari sukut reta enggau penatai pemisi nitihka garis lalau ti ditetapka.
Iya mega madahka kerejasama entara ejensi enggau opis ari baruh JPBNS ti bechairmanka Sapit Premier Sarawak Datuk Amar Douglas Uggah Embas, ngemeratka pengawa baum kena nisih penyikap enggau nentuka ungkup belanja sumber enggau tanggung pengawa ti nyata.
“Maya baum, tiap ejensi tauka opis nyendiaka riput kena nentuka chukup besedia enggau pekara ti diguna chukup awakka ulih betapi enggau penanggul maya penasah nyadi.
“Kami gawa nyadi siti raban enggau tiap entiti sama bejalaika tanggungpengawa,” ku iya.